నిపుణులను కాపాడుకోవడమే సవాలు

కంపెనీల పరిస్థితులపై సర్వే

ముంబయి: కొవిడ్‌ పరిణామాల తరవాత, నైపుణ్యం ఉన్న వారిని ఆకర్షించడం; వారిని అట్టేపెట్టిఉంచుకోవడం కంపెనీలకు అతిపెద్ద సవాలుగా మారిందని ఓ సర్వే వెల్లడించింది. ఈ ఏడాదీ నిపుణులను కాపాడుకోవడమే సవాలుగా ఉందని 78% సంస్థలు అభిప్రాయపడ్డాయని డబ్ల్యూటీడబ్ల్యూ(విలీస్‌ టవర్స్‌ వాట్సన్‌) నిర్వహించిన ‘రీఇమాజినింగ్‌ వర్క్‌ అండ్‌ రివార్డ్స్‌ సర్వే’ తేల్చింది. ఐటీ, టెలికాం, తయారీ, సాధారణ సేవలు, ఆర్థిక సేవలు, ఇంధన-యుటిలిటీ, ఆరోగ్య సంరక్షణ వంటి రంగాల్లోని 51 కంపెనీలు, 7,23,000 ఉద్యోగుల నుంచి సేకరించిన సమాచారంతో నివేదికను సంస్థ రూపొందించింది. దీని ప్రకారం..

* రెండేళ్లుగా దేశంలోని పలు సంస్థలు ఇబ్బందులు పడ్డాయి. నైపుణ్యం ఉన్న వారి వలసలను ఎదుర్కొంటున్నట్లు 78% కంపెనీలు పేర్కొన్నాయి. ఉద్యోగులను అట్టేపెట్టిఉంచుకోవడంలో ఒత్తిడి ఎదుర్కొన్నట్లు 64% సంస్థలు చెప్పాయి.

* 2020లో మాత్రం ఉద్యోగులను ఆకర్షించడం (29%), అట్టేపెట్టిఉంచుకోవడం (26%) సమస్య అని కొద్ది కంపెనీలే పేర్కొనగా.. 2021 ద్వితీయార్థానికి వచ్చేసరికి ఈ గణాంకాలు వరుసగా 68%, 73 శాతానికి చేరాయి.

* 2022లో నిపుణులను అట్టేపెట్టిఉంచుకోవడానికి కష్టపడుతున్న కంపెనీల సంఖ్య 64 శాతానికి పరిమితమైంది. కావాల్సిన నైపుణ్యాలున్న వారిని ఆకర్షించడం సమస్యగా మారిన సంస్థల సంఖ్య 78 శాతానికి పెరిగింది.

* డిజిటల్‌ అనుభవం ఉన్న సిబ్బందిని ఆకర్షించడం, అట్టేపెట్టిఉంచుకోవడం అనే సవాళ్లు ఎదురైనట్లు 85 శాతం సంస్థలు పేర్కొన్నాయి. విక్రయాల విభాగంలోనూ ఇబ్బందులు ఎదుర్కొంటున్నట్లు 74% కంపెనీలన్నాయి.

* పనిప్రదేశానికి సిబ్బంది తిరిగి వచ్చే విషయంలో; కరోనా సంబంధిత విధానాలకు ముగింపు పలికే విషయంలో ఇంకా వెనకబడే ఉన్నట్లు 54% సంస్థలు పేర్కొన్నాయి. ఈ విషయంలో 2023 లేదా ఆ తర్వాతే సాధారణ పరిస్థితులు కనిపించొచ్చని 12 శాతం మంది అభిప్రాయపడుతున్నారు.