చమురు పన్నుతో కేంద్రానికి రూ.94,800 కోట్లు

ఆర్‌ఐఎల్‌, ఓఎన్‌జీసీ లాభాలకు గండి

మార్జిన్లకు ఢోకా లేదు

మూడీస్‌ ఇన్వెస్టర్స్‌ సర్వీస్‌

దిల్లీ: ‘దేశీయంగా ముడి చమురు ఉత్పత్తి, పెట్రోల్‌-డీజిల్‌- విమాన ఇంధన ఎగుమతులపై పన్ను విధించడం వల్ల కేంద్రానికి ఈ ఆర్థిక సంవత్సరంలో 12 బిలియన్‌ డాలర్ల (దాదాపు రూ.94,800 కోట్లు) ఆదాయం లభించనుంది. రిలయన్స్‌ ఇండస్ట్రీస్‌(ఆర్‌ఐఎల్‌), ఓఎన్‌జీసీ వంటి కంపెనీల లాభాలు తగ్గనున్నాయని’ అంతర్జాతీయ రేటింగ్‌ ఏజెన్సీ మూడీస్‌ ఇన్వెస్టర్స్‌ సర్వీస్‌ పేర్కొంది. ఇంకా ఏమంటోందంటే..

* 2021-22లో నమోదైన ముడి చమురు ఉత్పత్తి, పెట్రోలియం ఉత్పత్తుల ఎగుమతుల ఆధారంగా లెక్కవేస్తే ప్రస్తుత ఆర్థిక సంవత్సరంలో 12 బి. డాలర్ల ఆదాయాన్ని ప్రభుత్వం పొందగలదని అంచనా వేస్తున్నాం.

* మే ఆఖరులో పెట్రోలు, డీజిల్‌ ఎక్సైజ్‌ సుంకంలో విధించిన కోత వల్ల ఏర్పడ్డ ఆదాయ నష్టాన్ని ఇందువల్ల తట్టుకోవచ్చు. ద్రవ్య ఒత్తిళ్ల నుంచీ ఉపశమనం కల్పించవచ్చు.

* ఈ చర్య తాత్కాలికమేనని అంచనా. ద్రవ్యోల్బణం, విదేశీ మారకం, కరెన్సీ క్షీణత వంటి పలు మార్కెట్‌ పరిస్థితులను బట్టి సర్దుబాటు చేసే అవకాశం ఉంది.

* ఇంధన ఉత్పత్తులపై అధిక ఎగుమతి సుంకాల వల్ల ఎగుమతులు తగ్గవచ్చు. పసిడి దిగుమతులపై అధిక కస్టమ్స్‌ సుంకం విధించినందున, కరెంట్‌ ఖాతా లోటు పెరగడం అదుపులో ఉండొచ్చు.

* రూపాయి బలహీనతలున్నా.. విదేశీ రుణాల చెల్లింపులో ఇబ్బందులు వచ్చినా భారత్‌కున్న భారీ విదేశీ మారకపు నిల్వలు పరిష్కారం చూపుతాయి.

* ఎగుమతి సుంకాల వల్ల ఆర్‌ఐఎల్‌ పెట్రో ఎగుమతులపై కాస్త ప్రభావం పడొచ్చు. అయితే ఆర్‌ఐఎల్‌ / ఓఎన్‌జీసీ రుణ నాణ్యతకు ఢోకా ఉండదు. ఓఎన్‌జీసీ మార్జిన్లు కాస్త తగ్గొచ్చు. అయితే కంపెనీ ఉత్పత్తి వ్యయాలు తక్కువగా ఉండడం, అధిక ముడి చమురు ధర వల్ల పెద్ద ఇబ్బంది కాకపోవచ్చు.