ప్రయాణికుల వాహన విక్రయాల్లో 40% వృద్ధి

జూన్‌లో మెరుగుపడిన చిప్‌ సరఫరా: ఫాడా  

దిల్లీ: జూన్‌లో దేశీయ ప్రయాణికుల వాహన రిటైల్‌ విక్రయాలు 40% పెరిగాయి. చిప్‌ సరఫరాలు మెరుగుపడటంతో పాటు ఎస్‌యూవీలకు గిరాకీ కొనసాగిందని వాహన డీలర్ల సమాఖ్య ఫాడా వెల్లడించింది. 2022 జూన్‌లో దేశీయంగా ప్రయాణికుల వాహన రిజిస్ట్రేషన్‌లు 2,60,683గా నమోదయ్యాయి. 2021 జూన్‌లో నమోదైన 1,85,998తో పోలిస్తే ఈసారి 40% అధిక రిజిస్ట్రేషన్లు జరిగాయి.  అన్ని విభాగాల్లో కలిసి వాహన రిటైల్‌ విక్రయాలు 2021 జూన్‌తో పోలిస్తే 27 శాతం పెరిగాయి. కొవిడ్‌ పరిణామాల ముందు నాటి 2019 జూన్‌తో పోలిస్తే ఈ ఏడాది జూన్‌లో మొత్తం అమ్మకాలు 9 శాతం తక్కువే. ‘చిప్‌ లభ్యత మెరుగుపడటంతో కంపెనీల నుంచి వాహన సరఫరాలు పెరిగాయి. అయితే ఎస్‌యూవీ, కాంపాక్ట్‌ ఎస్‌యూవీ విభాగాల్లో నిరీక్షణ కాలం ఇంకా అధికంగానే ఉంద’ని ఫాడా అధ్యక్షుడు వింకేశ్‌ గులాటీ పేర్కొన్నారు.