గృహిణుల కోసం టర్మ్‌ పాలసీ

బీమా సంస్థలు గృహిణులకు జీవిత బీమా పాలసీలు అందిస్తున్నప్పటికీ.. అవి వారి జీవిత భాగస్వామి పాలసీల్లో అనుబంధంగానే ఉంటుంటాయి. ఇలా కాకుండా పూర్తిగా గృహిణులు తమ కోసమే ప్రత్యేకంగా సొంత పాలసీని తీసుకునే వెసులుబాటును తీసుకొచ్చింది మ్యాక్స్‌ లైఫ్‌ ఇన్సూరెన్స్‌. ఈ టర్మ్‌ పాలసీ పేరు మ్యాక్స్‌ లైఫ్‌ స్మార్ట్‌ సెక్యూర్‌ ప్లస్‌ ప్లాన్‌. ఈ పాలసీని పాలసీబజార్‌.కామ్‌ ద్వారా ఆన్‌లైన్‌లో అందిస్తోంది. పూర్తిగా రక్షణకే పరిమితం అయ్యే టర్మ్‌ పాలసీ ఇది. గృహిణులకూ ఆర్థిక భద్రత కల్పించడంతోపాటు, భర్త జీవిత బీమా కవరేజీలో వారు భాగం కావాల్సిన అవసరాన్ని ఇది తప్పించనుంది. కుటుంబ ఆదాయం కనీసం రూ.5లక్షలు ఉన్న వారికి ఈ పాలసీ అందిస్తారు. 18-50 ఏళ్లలోపు వారు అర్హులు. గృహిణిగా ఒక మహిళ అందించే సేవలకు వెలకట్టలేం. ఈ పాలసీ భారతీయ మహిళలకు ఆర్థిక సాధికారత కల్పించడంలో తోడ్పడుతుందని మ్యాక్స్‌ లైఫ్‌ డిప్యూటీ మేనేజింగ్‌ డైరెక్టర్‌ వి.విశ్వనాథ్‌ అన్నారు. తీవ్ర అనారోగ్యం, ప్రమాదాలకు సంబంధించిన అనుబంధ పాలసీలనూ జోడించుకోవచ్చు.