స్థిరమైన రాబడి వచ్చేలా

హెచ్‌డీఎఫ్‌సీ మ్యూచువల్‌ ఫండ్‌ సంస్థ నుంచి కొత్తగా ఒక ఫిక్స్‌డ్‌ మెచ్యూరిటీ పథకం అందుబాటులోకి వచ్చింది ‘హెచ్‌డీఎఫ్‌సీ ఎఫ్‌ఎంపీ 1469డి ఏప్రిల్‌ 2022’ అనే ఈ రుణ పథకం ఎన్‌ఎఫ్‌ఓ (న్యూ ఫండ్‌ ఆఫర్‌) ముగింపు తేదీ ఈ నెల 19. దీనికి వికాస్‌ అగర్వాల్‌ ఫండ్‌ మేనేజర్‌. ఎన్‌ఎఫ్‌ఓలో కనీసం రూ.5,000 పెట్టుబడిగా పెట్టాలి. ఎంట్రీ లోడ్‌ లేదు. ఇది క్లోజ్‌ ఎండెడ్‌ పథకం. అంటే ఈ పథకం యూనిట్లు కొనుగోలు చేసిన మదుపరులు పథకం ముగిసే వరకూ తమ పెట్టుబడిని కొనసాగించాల్సి ఉంటుంది. ఈ పథకం కింద సేకరించిన నిధులను రుణ, మనీ మార్కెట్‌ పత్రాల్లో పెట్టుబడిగా పెడతారు. ప్రభుత్వ బాండ్లపై లభిస్తున్న వడ్డీ రేటుకు అనుగుణంగా ఇటువంటి పథకాల్లో ప్రతిఫలం లభిస్తుంది. రిస్కు దాదాపుగా ఉండదు. బ్యాంకు డిపాజిట్లలో సొమ్ము పెట్టాలనుకునే మదుపరులు ప్రత్యామ్నాయంగా ఈ పథకాన్ని పరిశీలించవచ్చు.