హామీ సంతకం చేస్తున్నారా?
బ్యాంకులు, ఆర్థిక సంస్థలు తక్కువ క్రెడిట్ స్కోరు ఉన్న వారికి రుణాలు ఇచ్చేందుకు సాధారణంగా ఇష్టపడవు. కొన్నిసార్లు మంచి క్రెడిట్ స్కోరు ఉన్న వ్యక్తి హామీ సంతకం చేస్తే.. రుణాలను మంజూరు చేస్తామని చెప్పొచ్చు.
బ్యాంకులు, ఆర్థిక సంస్థలు తక్కువ క్రెడిట్ స్కోరు ఉన్న వారికి రుణాలు ఇచ్చేందుకు సాధారణంగా ఇష్టపడవు. కొన్నిసార్లు మంచి క్రెడిట్ స్కోరు ఉన్న వ్యక్తి హామీ సంతకం చేస్తే.. రుణాలను మంజూరు చేస్తామని చెప్పొచ్చు. 650 క్రెడిట్ స్కోరు కన్నా తక్కువగా ఉండటం, ఉద్యోగంలో స్థిరత్వం లేకపోవడం, వయసు ఎక్కువగా ఉన్నవారికీ సాధారణంగా ఇతర వ్యక్తులను హామీగా చూపించాలని అడుగుతుంటాయి. ఇలా మీరెవరికైనా హామీ ఉండాల్సి వచ్చిన సందర్భం ఎదురైతే ఎలాంటి జాగ్రత్తలు తీసుకోవాలో చూద్దామా..
అప్పు తీసుకునే వ్యక్తికి హామీ ఉంటున్నారంటే.. ఆ రుణానికి మీరూ బాధ్యత వహించాల్సిందే. రుణగ్రహీత ఆ అప్పు తీర్చని సందర్భంలో హామీగా ఉన్న వ్యక్తి దాన్ని చెల్లించాల్సి ఉంటుంది. హామీ పత్రం మీద సంతకం చేసేటప్పుడు ఈ విషయాన్ని ముందుగా అర్థం చేసుకోవాలి.
తిరిగి చెల్లించగలరా?
రుణ గ్రహీత అప్పును తిరిగి చెల్లించడంలో ఇబ్బంది ఎదుర్కోవచ్చు అనే అంచనాతోనే రుణదాత హామీ సంతకాన్ని అడుగుతుంటారు. కాబట్టి, హామీ సంతకం చేసేవారు.. ముందుగా అప్పు తీసుకుంటున్న వ్యక్తి గురించి ఆరా తీయాలి. అతను ఎంత దగ్గరి వ్యక్తి అయినా.. ఉన్న ఆస్తులు, ఇతర పెట్టుబడుల గురించి అడిగి తెలుసుకోవాలి. రుణం చెల్లించలేని సందర్భంలో పెట్టుబడులు వెనక్కి తీసుకోవడం, ఆస్తులను విక్రయించి రుణం తీర్చేయడానికి ఏమైనా ఇబ్బందులున్నాయా తెలుసుకోవాలి. రుణగ్రహీత క్రెడిట్ స్కోరు నివేదికను చూడాలి. దీనివల్ల ఇప్పటికే ఉన్న రుణాలు, వాటిని చెల్లించిన తీరు గురించి మీకు ఒక అవగాహన వస్తుంది. క్రెడిట్ నివేదిక సరిగా లేకపోతే.. మీరు హామీ సంతకం చేయకుండా నిరాకరించండి. ఇక్కడ ఎలాంటి మొహమాటాలకూ పోవద్దు. అతను/ఆమె రుణం తీర్చకపోతే ఆ భారం మీపై పడుతుందని మర్చిపోవద్దు.
మీరే రుణం తీసుకుంటున్నారా?
ఇంటి, వాహన, వ్యక్తిగత రుణాల్లో ఏదో ఒకటి తీసుకోవాలనే ఆలోచనతో ఉన్నారా? ఎట్టి పరిస్థితుల్లోనూ ఎవరికీ హామీగా ఉండొద్దు. దీనివల్ల మీ రుణ అర్హతపై ప్రభావం పడుతుంది. 750కి పైగా క్రెడిట్ స్కోరు ఉన్నవారికి బ్యాంకులు ఇప్పుడు ప్రత్యేక వడ్డీ రేట్లను అందిస్తున్నాయి. మీరు హామీగా ఉన్న వ్యక్తి రుణ వాయిదాలు సరిగ్గా చెల్లించకపోతే ఆ ప్రభావం మీ స్కోరుపైనా ఉంటుంది. మీ స్కోరు తగ్గడం వల్ల వడ్డీ రేట్ల తగ్గింపు ప్రయోజనం కోల్పోతారు. అన్ని క్రెడిట్ బ్యూరో సంస్థలూ బ్యాంకులు/ఆర్థిక సంస్థలకు హామీగా ఉన్న వారి వివరాలను అందిస్తాయి.
పాలసీతో రక్షణ..
రుణగ్రహీత వాయిదాలు సరిగా చెల్లించకపోతే.. బ్యాంకులు హామీగా ఉన్న వ్యక్తికి నోటీసులు పంపిస్తాయి. ఒకవేళ హామీదారుడూ రుణాన్ని చెల్లించకపోతే.. అతన్నీ ఎగవేతదారుల జాబితాలో చేరుస్తాయి. భవిష్యత్లో ఇతర రుణాలకు దరఖాస్తు చేసుకునే అవకాశం లేకుండా చేస్తాయి. అందుకే, రుణాన్ని తీసుకున్న వ్యక్తులు లోన్ ప్రొటెక్షన్ ఇన్సూరెన్స్ ప్లాన్ను తీసుకోవడం మంచిది. ఇది రుణాల చెల్లించేందుకు హామీ ఇవ్వదు. కాకపోతే.. రుణగ్రహీత మరణించిన సందర్భంలో హామీదారుడు, సహ-దరఖాస్తుదారులకు ఇబ్బంది లేకుండా.. ఆ రుణాన్ని చెల్లించేస్తాయి. హామీగా ఉంటున్నప్పుడు అప్పు తీసుకున్న వ్యక్తి ఈ బీమా పాలసీ తీసుకున్నారా లేదా అనేది చూసుకోవాలి.
ఒప్పందం చేసుకోండి..
కొన్నిసార్లు తప్పనిసరి పరిస్థితుల్లో హామీ సంతకం చేయాల్సి రావచ్చు. ఒకసారి హామీ ఇచ్చిన తర్వాత రుణ వ్యవధి కొనసాగినన్ని రోజులూ దాన్ని మార్చడం కుదరదు. ఇలాంటప్పుడు రుణగ్రహీతతో ముందుగానే ఒక ఒప్పంద పత్రం రాయించుకోవాలి. భవిష్యత్లో ఏదైనా ఇబ్బంది వచ్చి, హామీ ఉన్న వ్యక్తి రుణాన్ని తీర్చాల్సి రావచ్చు. ఇలాంటప్పుడు ఈ ఒప్పందం హామీదారుడికి రక్షణగా ఉంటుంది. రుణ గ్రహీత కుటుంబ సభ్యులతోనూ ఈ విషయం గురించి చర్చించాలని నిపుణులు సూచిస్తున్నారు.
Trending
గమనిక: ఈనాడు.నెట్లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.
మరిన్ని
తాజా వార్తలు (Latest News)
-
కాబోయే ప్రధాని రాహుల్ గాంధీనే: సీఎం రేవంత్రెడ్డి
-
అల్లు అర్జున్ సినిమాలో నటించే అవకాశం వచ్చింది.. కానీ: విశాల్
-
ఇంటినే చక్కదిద్దలేరు.. ఇక రాష్ట్రాన్ని ఎలా?: అనురాగ్ ఠాకూర్
-
బందరుకు ఏం చేశారో చెప్పే ధైర్యం నీతుల నానికి ఉందా?: చంద్రబాబు
-
గుజరాత్ను వణికించిన దిల్లీ
-
దేశ సరిహద్దులు పూర్తిగా సురక్షితమే: రాజ్నాథ్ సింగ్