ఇంటి రుణం vs స్థల రుణం

ఇంటి రుణం, స్థల రుణం చాలా విషయాల్లో ఒకేలా ఉంటాయి, కానీ వాటి మధ్య కొన్ని ప్రాథమిక తేడాలు ఉన్నాయి. రెండిటి మధ్య ఉన్న తేడాలు, ఏది మీకు అనుకూలంగా ఉంటుందో తెలుసుకోండి.

ఇంటి రుణం vs స్థల రుణం:

21 సంవత్సరాల వయస్సు దాటిన భారతీయ పౌరులకు బ్యాంకులు, నాన్ బ్యాంకింగ్ ఫైనాన్షియల్ కంపెనీలు ఇంటి రుణం, స్థల రుణాలను అందిస్తాయి. కొన్ని బ్యాంకులు మాత్రం ఇంటిని నిర్మించుకోవాలనుకునే ఎన్ఆర్ఐ లకు స్థల రుణాన్ని కూడా అందిస్తున్నాయి. అప్పటికే నిర్మించిన, నిర్మాణంలో ఉన్న ఒక ఇంటిని కొనుగోలు చేయడానికి బ్యాంకు లేదా నాన్ బ్యాంకింగ్ ఫైనాన్షియల్ కంపెనీలు ద్వారా గృహ రుణాన్ని మంజూరు చేయాలంటే, మీరు కొనుగోలు చేసే స్థలాన్ని నివాసం కోసం వినియోగించాల్సి ఉంటుంది. అలాగే, ఆమోదం పొందిన ఆస్తుల పై అవి ఉన్న ప్రాంతం లేదా పరిమాణంతో సంబంధం లేకుండా ఇంటి రుణాలు లభిస్తాయి. కానీ స్థల రుణాలకు కొన్ని నిబంధనలు ఉన్నాయి.

నిబంధనలు:

* రుణం తీసుకున్న స్థలాన్ని కేవలం నివాసానికి మాత్రమే వినియోగించాలి.

* దీనిని వ్యవసాయానికి గానీ, వాణిజ్య పరంగా గానీ వినియోగించకూడదు.

* ఇది నగర పాలక సంస్థ పరిధిలోనే ఉండాలి.

* పారిశ్రామిక ప్రాంతంలో గానీ, గ్రామంలో గానీ ఉండకూడదు.

స్థల రుణాలకు తక్కువ ఎల్టీవీ:

ఇంటి రుణాలపై గరిష్టంగా 80 నుంచి 85 శాతం వరకు రుణాన్ని పొందవచ్చు (కొన్ని సందర్భాల్లో 90 శాతం పొందవచ్చు). కానీ స్థల రుణాలపై ప్లాట్లు విలువలో గరిష్టంగా 70 శాతం రుణాన్ని మాత్రమే పొందగలరు. కాబట్టి, ఒకవేళ మీరు వ్యక్తిగత ఉపయోగం కోసం లేదా పెట్టుబడిగా ప్లాట్లు కొనుగోలు చేస్తున్నట్లయితే, కనీసం 30 శాతం నిధులను మీరు సొంతంగా వెచ్చించాల్సి ఉంటుంది. ఒకవేళ ఆస్తి చిన్న నగరాల్లో లేదా పట్టణాలలో ఉన్నట్లయితే, స్థల రుణాలకు గరిష్ట రుణ విలువ (ఎల్టీవీ) నిష్పత్తి తక్కువగా ఉంటుంది, ప్లాట్లు మొత్తం వ్యయంలో ఇది 50 శాతం నుంచి 60 శాతంగా ఉంటుంది.

వడ్డీ రేటు:

గృహ రుణాలపై, స్థల రుణాలపై బ్యాంకులు వసూలు చేసే వడ్డీ రేట్లు దాదాపు ఒకేలా ఉంటాయి. అయినప్పటికీ, గృహ రుణ వడ్డీ రేట్లు సాధారణంగా కొన్ని బేసిస్ పాయింట్లు (100 బేసిస్ పాయింట్లు = 1 శాతం) స్థల రుణాల కంటే చౌకగా ఉంటాయి. ఇది రుణగ్రహీత ప్రొఫైల్ ఆధారంగా స్వల్ప వ్యత్యాసాలు ఉండవచ్చు. అలాగే, రెండు రకాల రుణాలు అదనపు ప్రాసెసింగ్ రుసుమును వసూలు చేస్తాయి.

కాలపరిమితి:

స్థల రుణాలతో పోల్చితే గృహ రుణాలకు ఎక్కువ కాల కాలపరిమితి ఉంటుంది. సాధారణంగా, గృహ రుణాలకు కాలపరిమితి 30 సంవత్సరాల వరకు ఉంటుంది, కానీ స్థల రుణాలకు గరిష్ట కాలపరిమితి 15 సంవత్సరాలు మాత్రమే. కొన్ని నాన్ బ్యాంకింగ్ ఫైనాన్షియల్ కంపెనీలు మాత్రం స్థల రుణాలకు 20 సంవత్సరాల కాలపరిమితిని అందిస్తున్నాయి.

పన్ను మినహాయింపు:

మీరు స్థలం కోసం తీసుకున్న రుణానికి నెలవారీ చెల్లించే చెల్లింపులపై ఆదాయ పన్ను మినహాయింపు వర్తించదు. అయితే, మీరు కొనుగోలు చేసిన స్థలంలో నిర్మాణం ప్రారంభించినట్లయితే, ఆ రుణంపై పన్ను ప్రయోజనాలను పొందేందుకు మీరు అర్హులు. తీసుకున్న రుణంలో ఇంటి నిర్మాణం కోసం వినియోగించిన భాగాన్ని మాత్రమే పన్ను మినహాయింపు కోసం ఉపయోగించవచ్చు. నిర్మాణం పూర్తయిన సంవత్సరం నుంచి మాత్రమే పన్ను మినహాయింపు వర్తిస్తుంది. దీనికి విరుద్ధంగా, గృహ రుణాల కోసం వడ్డీపై మినహాయింపును పొందవచ్చు.

మొత్తం మీద, స్థల రుణాలకు సంబంధించిన చట్టపరమైన పత్రాల ధృవీకరణ గృహ రుణాల ధృవీకరణ కంటే కఠిన మైనది. కాబట్టి, స్థల రుణం తీసుకోవాలని భావించినప్పుడు చట్టపరమైన సహాయం తీసుకోవడం మంచిది.