Credit Card: ఆదాయం లేకున్నా క్రెడిట్‌ కార్డు పొందండిలా!

Credit Card: ఆదాయం లేనివారికి కూడా కొన్ని సంస్థలు క్రెడిట్‌ కార్డుని జారీ చేస్తున్నాయి. అయితే, వీటిలో కొన్ని పరిమితులు ఉంటాయి. పైగా బిల్లు చెల్లించే స్తోమత మీకుందని చూపించాల్సి ఉంటుంది.

Published : 19 Oct 2022 11:01 IST

Credit Card: సాధారణంగా బ్యాంకులు దరఖాస్తుదారుల ఆదాయాన్ని ఆధారం చేసుకొని క్రెడిట్‌ కార్డు (Credit Card)లు జారీ చేస్తాయి. ఒక వ్యక్తి నెలవారీ ఆదాయం వారి తిరిగి చెల్లించే స్తోమతను తెలియజేస్తుంది. అలాగే క్రెడిట్‌ చరిత్ర (Credit History) ఆర్థిక అంశాల్లో ఎంత బాధ్యతగా వ్యవహరిస్తున్నారో చెప్పేస్తుంది. ఈ నేపథ్యంలో ఆదాయం లేకుండా క్రెడిట్‌ కార్డు (Credit Card) పొందడం కష్టమైన విషయమే. అయితే, అసాధ్యమైతే కాదు.

వాస్తవానికి బ్యాంకులు లేదా ఇతర జారీ సంస్థలు దరఖాస్తు చేసుకున్న అందరికీ క్రెడిట్‌ కార్డు (Credit Card)లు ఇవ్వాలనే చూస్తాయి! కానీ, ఆ వ్యక్తికి తిరిగి చెల్లించే స్తోమత లేకపోతే మాత్రం రిస్క్‌ తీసుకోలేవు. ఎందుకంటే అది వారి వ్యాపారంపై తీవ్ర ప్రభావం చూపుతుంది. అందుకే కార్డు తీసుకోవాలనుకుంటున్న వ్యక్తి బిల్లును ఎలా చెల్లిస్తారనేది బ్యాంకులు నిశితంగా పరిశీలిస్తాయి. ఆ తర్వాతే కార్డును జారీ చేస్తాయి.

ఆదాయం లేకుండా ఈ కింది మార్గాల్లో క్రెడిట్‌ కార్డు పొందొచ్చు..

స్టూడెంట్‌ క్రెడిట్‌ కార్డు..

కొన్ని సంస్థలు విద్యార్థులకు కూడా క్రెడిట్ కార్డులు అందజేస్తున్నాయి. తక్కువ క్రెడిట్‌ పరిమితితో దీన్ని ఇస్తాయి. ప్రత్యేకంగా విద్యార్థుల అవసరాలను దృష్టిలో ఉంచుకొని వీటిని రూపొందించాయి. అయితే, దీనికోసం ఏదో ఒకటి తనఖా పెట్టాల్సి ఉంటుంది. ఏదైనా పార్ట్‌-టైం ఉద్యోగం చేస్తున్నట్లయినా చూపించాలి. లేదంటే ఫిక్స్‌డ్‌ డిపాజిట్‌, పొదుపు ఖాతాను చూపించి తీసుకోవాలి. సాధారణ క్రెడిట్‌ కార్డుల్లా స్టూడెంట్‌ కార్డుల్లో అన్ని వెసులుబాట్లు ఉండవు. ప్రవేశ రుసుము, వార్షిక ఫీజులు నామమాత్రంగా ఉంటాయి.

ఫిక్స్‌డ్‌ డిపాజిట్‌పై కార్డు..

ఆదాయం లేకుండా క్రెడిట్‌ కార్డు తీసుకోవాలనుకునే చాలా మంది ఫిక్స్‌డ్‌ డిపాజిట్‌ను ఆధారం చేసుకుంటారు. అంటే ఫిక్స్‌డ్‌ డిపాజిట్‌ సొమ్మును తనఖా పెట్టి కార్డు తీసుకుంటున్నారన్నమాట! దీన్నే సెక్యూర్డ్‌ క్రెడిట్‌ కార్డు (secured credit card) అంటారు. ఎఫ్‌డీ మొత్తంలో 75-90 శాతాన్ని క్రెడిట్‌ కార్డు పరిమితిగా విధిస్తారు.

మ్యూచువల్‌ ఫండ్స్‌ ఆధారంగా..

ఫిక్స్‌డ్‌ డిపాజిట్‌ తరహాలోనే మ్యూచువల్‌ ఫండ్లను చూపించి కూడా క్రెడిట్‌ కార్డును తీసుకోవచ్చు. ఇది కూడా సెక్యూర్డ్‌ క్రెడిట్‌ కార్డు పరిధిలోకే వస్తుంది. ఒకవేళ బిల్లు ఎగ్గొట్టినట్లయితే.. బ్యాంకులు మ్యూచువల్‌ ఫండ్ల నుంచి వసూలు చేసుకునే అవకాశం ఉంటుంది.

బ్యాంక్ బ్యాలెన్స్‌ చూపించి...

కొన్ని సంస్థలు బ్యాంక్‌ బ్యాలెన్స్‌ను ఆధారంగా చేసుకొని కూడా క్రెడిట్‌ కార్డుని జారీ చేస్తున్నాయి. బ్యాంకు ఖాతాలో నిత్యం తగినంత సొమ్ము ఉంటుందని ఆధారాలు సమర్పించాల్సి ఉంటుంది. పెద్ద ఎత్తున లావాదేవీల ద్వారా నిరంతరం ఖాతాలో డబ్బు జమై ఉంటుందని చూపించగలగాలి. అలాగే క్రెడిట్‌/డెట్‌ నిష్పత్తిని సరిగా నిర్వహించాలి. అప్పుడు బిల్లును సకాలంలో చెల్లించేందుకు కావాల్సిన డబ్బులు ఉంటాయని సంస్థలు విశ్వసించి కార్డును జారీ చేస్తాయి.

యాడ్‌-ఆన్‌ కార్డు..

ఇప్పటికే ఒక క్రెడిట్‌ కార్డు ఉన్నట్లయితే.. దాన్ని ఆధారంగా చేసుకొని సంస్థలు మరో యాడ్‌-ఆన్‌ కార్డుని జారీ చేస్తుంటాయి. దీనికి ఎలాంటి ఆదాయ పత్రాలు సమర్పించాల్సిన అవసరం ఉండదు. రెండింట్లో దాదాపు ఒకే తరహా ప్రయోజనాలు ఉంటాయి. కుటుంబంలో ఒకరికి కార్డు ఉండి, వారి క్రెడిట్ చరిత్ర బాగున్నట్లయితే.. మరొకరి కోసం యాడ్‌-ఆన్‌ కార్డు తీసుకోవచ్చు.

జాయింట్‌ క్రెడిట్‌ కార్డు..

బ్యాంకులో జాయింట్‌ ఖాతా తరహాలోనే క్రెడిట్‌ కార్డుని కూడా పొందొచ్చు. సహ-దరఖాస్తుదారుడి ఆదాయ పత్రాలు కార్డు జారీకి అర్హమైనవే అయితే సరిపోతుంది. ఆ వ్యక్తి స్తోమతను ఆధారంగా చేసుకొని జాయింట్‌ కార్డుని జారీ చేస్తారు.

Read latest Business News and Telugu News

Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts