Gold: దిగుమతి సుంకం ఎఫెక్ట్‌.. ఒక్కరోజే రూ.1310 పెరిగిన బంగారం ధర

దిల్లీ: పసిడి ప్రియులకు షాకిస్తూ బంగారంపై దిగుమతి సుంకాన్ని పెంచుతున్నట్లు కేంద్ర ప్రభుత్వం శుక్రవారం ప్రకటించింది. దీంతో బులియన్‌ మార్కెట్లో పుత్తడి ధర ఒక్కసారిగా పెరిగింది. దేశ రాజధాని దిల్లీలో శుక్రవారం 10 గ్రాముల మేలిమి బంగారం ధర రూ.1,310 పెరిగి రూ.52,200కి చేరింది. మరోవైపు వెండి ధర మాత్రం స్వల్పంగా తగ్గడం గమనార్హం. అటు వెండి ధర కూడా రూ.400 పెరిగి కేజీ ధర రూ.59,000 పలికింది.

బంగారంపై దిగుమతి సుంకాన్ని పెంచడంతో బులియన్‌ మార్కెట్లో ఈ లోహం ధర పెరిగినట్లు హెచ్‌డీఎఫ్‌సీ సెక్యూరిటీ సీనియర్‌ అనలిస్ట్‌ తపన్‌ పటేల్‌ తెలిపారు. మరోవైపు, అంతర్జాతీయ విపణిలో మాత్రం ఈ లోహాల ధరలు క్రితం రోజుతో పోలిస్తే కాస్త తగ్గాయి. ఔన్సు బంగారం ధర 1794 డాలర్లు, ఔన్సు వెండి ధర 19.76గా ఉంది.

బంగారంపై దిగుమతి సుంకాన్ని 5శాతం పెంచుతున్నట్లు కేంద్ర ప్రభుత్వం నేడు వెల్లడించింది. దేశంలో పసిడి దిగుమతులు నానాటికీ పెరుగుతున్న నేపథ్యంలో కరెంట్‌ ఖాతా లోటును అధిగమించేందుకు ఈ నిర్ణయం తీసుకున్నట్లు తెలిపింది. ఈ పెంపు జులై 30 నుంచే అమల్లోకి వచ్చినట్లు పేర్కొంది. నిన్నటివరకు పుత్తడిపై ప్రాథమిక దిగుమతి సుంకం 7.5శాతంగా ఉండగా.. తాజా పెంపుతో అది 12.5శాతానికి చేరింది. దీనికి 2.5శాతం అగ్రికల్చర్ ఇన్ఫ్రాస్ట్రక్చర్‌ సెస్ అదనం. దీంతో బంగారంపై దిగుమతి పన్ను 15 శాతానికి చేరింది. ఈ మొత్తానికి 3 శాతం జీఎస్టీ వర్తిస్తుంది. పెరిగిన దిగుమతి సుంకంతో రానున్న రోజుల్లో పసిడి ధరలు మరింత పెరిగే అవకాశముందని బులియన్‌ వర్గాలు పేర్కొంటున్నాయి.