Google: గూగుల్‌ స్ట్రీట్‌వ్యూ.. ఇప్పుడు చిన్న చిన్న గ్రామాల్లోనూ!

ఇంటర్నెట్‌ డెస్క్‌: గూగుల్‌ మ్యాప్స్‌ (Google Maps) వినియోగించే వారికి స్ట్రీట్‌ వ్యూ (Google Street View) గురించి అవగాహన ఉండే ఉంటుంది. మనం అడ్రస్‌ కోసం వెతికే చోట ఉన్న షాపు, ఇల్లు లేదా ఆఫీస్‌ను 360 డిగ్రీల కోణంలో చూడొచ్చు. ఒకరకంగా దీన్ని వర్చువల్ ప్రజెంటేషన్‌గా చెప్పొచ్చు. దీంతో యూజర్‌ ఆ ప్రాంతలో ఉండి అక్కడి పరిసరాలను చూస్తున్న అనుభూతి కలుగుతుంది. ఇప్పటిదాకా గూగుల్ స్ట్రీట్‌ వ్యూ ఫీచర్‌ భారత్‌లోని కొన్ని ప్రధాన నగరాల్లో మాత్రమే అందుబాటులో ఉంది. ఇకపై దేశంలోని ప్రతి గ్రామంలో  ఈ ఫీచర్‌ అందుబాటులో ఉంటుందని గూగుల్ తెలిపింది. దీంతో యూజర్లు మ్యూజియం, రెస్టారెంట్‌, చిన్న వ్యాపార సంస్థలను సులువుగా చేరుకోవచ్చు. ప్రస్తుతం ఈ స్ట్రీట్‌ వ్యూ ఫీచర్‌ ద్వారా దేశంలోని దాదాపు అన్ని గ్రామాల్లోని వీధులకు అందుబాటులో ఉంది. త్వరలోనే మిగిలిన గ్రామాలను స్ట్రీట్‌ వ్యూ ద్వారా అందుబాటులోకి తీసుకొస్తామని గూగుల్ చెబుతోంది. 

ఎలా ఉపయోగించాలి? 

మొబైల్ లేదా కంప్యూటర్‌లో గూగుల్‌ మ్యాప్స్‌ ద్వారా స్ట్రీట్‌ వ్యూ ఫీచర్‌ను ఉపయోగించుకోవచ్చు. మొబైల్‌లో గూగుల్ మ్యాప్స్‌ యాప్‌ ఓపెన్‌ చేసిన తర్వాత కుడివైపు పై భాగంలో చతురస్రాకారంలో ఉండే సింబల్‌ కనిపిస్తుంది. దానిపై క్లిక్‌ చేస్తే టెరైన్‌, శాటిలైట్‌ వంటి ఆప్షన్స్ కనిపిస్తాయి. అందులో స్ట్రీట్‌ వ్యూ ఆప్షన్‌ను సెలెక్ట్‌ చేయాలి.

కంప్యూటర్‌లో గూగుల్ మ్యాప్స్‌ ఓపెన్ చేసిన తర్వాత ఎడమవైపు కింది భాగంలో లేయర్స్ (Layers) అనే ఆప్షన్‌ కనిపిస్తుంది. దానిపై క్లిక్‌ చేసి, స్ట్రీట్‌ వ్యూ ఆప్షన్‌ను ఎంచుకోవాలి. తర్వాత మీరు వెతుకుతున్న అడ్రస్‌ను సెర్చ్‌ బార్‌లో ఎంటర్‌ చేయాలి. లేదా గూగుల్ మ్యాప్స్‌ ద్వారా మీకు కావాల్సిన ప్రదేశం కోసం మౌస్‌ సాయంతో వెతకవచ్చు. ఒకవేళ అడ్రస్‌ సెర్చ్‌బార్‌లో టైప్‌ చేస్తే.. ఆ ప్రదేశాన్ని గూగుల్ మ్యాప్స్‌లో మార్క్‌ చేసి చూపిస్తుంది. దానిపై క్లిక్‌ చేసి స్ట్రీట్‌ వ్యూ సాయంతో పరిసరాలను చూడొచ్చు.

గతంలో భారత్‌లో నిషేధం విధించి

విదేశాల్లో ఈ ఫీచర్‌ ఎప్పుడో అందుబాటులో ఉన్నప్పటికీ, భద్రతా కారణాల దృష్ట్యా భారత్‌లో ఈ ఫీచర్‌కు ప్రభుత్వం  2016లో అనుమతులు నిరాకరించింది. 2018లో గూగుల్ స్ట్రీట్‌ వ్యూ ప్రతిపాదనను ప్రభుత్వం ముందుంచగా మరోసారి తిరస్కరణకు గురైంది. స్ట్రీట్‌ వ్యూ ఫీచర్‌లో పనోరమిక్‌ ఫొటోలతో నగరాలు, గ్రామాల్లోని వీధులను చూడొచ్చు. దీనివల్ల ఆ పరిసర ప్రాంతాల్లో ఉండే వ్యక్తుల గోప్యతకు భంగం కలిగే అవకాశం ఉందని ప్రభుత్వం దీనిపై అభ్యంతరం వ్యక్తం చేసింది. ఈ సమస్యకు పరిష్కారంగా స్ట్రీట్‌ వ్యూ కోసం సేకరించే పనోరమిక్‌ ఫొటోల్లోని వ్యక్తుల ముఖాలు, వాహనాల నంబర్‌ ప్లేట్లు వంటి వాటిని కనపడకుండా చేస్తామని తెలిపింది. దీంతో గూగుల్ స్ట్రీట్ వ్యూను ప్రభుత్వం ఆమోదించడంతో  గతేడాది ఈ ఫీచర్‌ను గూగుల్ భారత్‌లోని యూజర్లకు పరిచయం చేయగా.. తాజాగా దేశంలోని అన్ని ప్రాంతాల్లో అందుబాటులోకి తీసుకొచ్చింది.