Samsung: శాంసంగ్‌ ఫోన్లలో ఇక గూగుల్‌ స్థానంలో బింగ్‌..?

వాషింగ్టన్‌: తమ ఎలక్ట్రానిక్‌ పరికరాల్లో గూగుల్‌ (Google) స్థానంలో మైక్రోసాఫ్ట్‌కు చెందిన సెర్చింజన్‌ బింగ్‌ (Bing)ను ప్రవేశపెట్టాలని శాంసంగ్‌ (Samsung) యోచిస్తున్నట్లు సమాచారం. దీనివల్ల గూగుల్‌ (Google) దాదాపు మూడు బిలియన్ డాలర్ల ఆదాయం కోల్పోయే అవకాశం ఉందని అంచనా. ఈ మేరకు విశ్వసనీయ వర్గాలను ఉటంకిస్తూ అమెరికాలో ప్రముఖ పత్రిక న్యూయార్క్‌ టైమ్స్‌ ఆదివారం ఓ కథనం ప్రచురించింది.

బింగ్‌ (Bing) నుంచి గూగుల్‌ (Google)కు ఇటీవల గట్టిపోటీ ఎదురవుతోంది. ముఖ్యంగా ఓపెన్‌ఏఐకి చెందిన చాట్‌జీపీటీ సాంకేతికతను బింగ్‌ (Bing) సెర్చ్‌కు అదనపు ఫీచర్‌గా జత చేసిన తర్వాత అది మరింత తీవ్రమైంది. ‘ఇంటర్నేషనల్‌ డేటా కార్పొరేషన్‌’ వివరాల ప్రకారం.. 2022లో శాంసంగ్‌ (Samsung) 26.1 కోట్ల స్మార్ట్‌ఫోన్లను సరఫరా చేసింది. ఇవన్నీ గూగుల్‌కు చెందిన ఆండ్రాయిడ్‌ ఆపరేటింగ్‌ సిస్టమ్‌ ఆధారంగా పనిచేస్తాయి. మైక్రోసాఫ్ట్‌, గూగుల్‌ (Google)తో సుదీర్ఘకాలంగా భాగస్వామ్యం కొనసాగిస్తున్న శాంసంగ్‌.. తమ ఎలక్ట్రానిక్‌ ఉత్పత్తుల్లో రెండు కంపెనీలకు చెందిన యాప్‌లు, సేవలను ముందుగానే ఇన్‌స్టాల్‌ చేసి వినియోగదారులకు అందిస్తోంది. తాజాగా బింగ్‌ (Bing)ను డిఫాల్ట్‌ సెర్చింజన్‌గా ఇవ్వడంపై ప్రస్తుతం చర్చలు జరుగుతున్నాయని సమాచారం. ప్రస్తుతానికైతే ఇంకా కొంతకాలం గూగుల్‌ (Google)నే కొనసాగించే అవకాశం ఉందని తెలుస్తోంది.

మరోవైపు బింగ్‌ (Bing) నుంచి ఎదురవుతున్న పోటీని తట్టుకునేందుకు గూగుల్‌ (Google) సైతం సిద్ధమవుతోంది. సెర్చింజన్‌కు కృత్రిమ మేధ ఆధారిత ఫీచర్లను జత చేసేందుకు సన్నాహాలు చేస్తోంది. దీనిపై ప్రత్యేకంగా 160 మంది ఉద్యోగులు పనిచేస్తున్నట్లు సమచారం.