Pixel Fold: గూగుల్‌ నుంచి తొలి ఫోల్డబుల్‌ ఫోన్‌.. ఎలా ఉందో చూశారా?

ఇంటర్నెట్ డెస్క్‌: గూగుల్‌ నుంచి ఫోల్డబుల్‌ ఫోన్‌ రాబోతోందంటూ గతకొంత కాలంగా ఊహాగానాలు జోరుగా వినిపిస్తున్నాయి. ఎట్టకేలను అవి నిజమేనని గూగుల్‌ ధ్రువీకరించింది. పిక్సెల్‌ ఫోల్డ్‌ (Pixel Fold) పేరిట మడతపెట్టే ఫోన్‌ను తీసుకురానున్నట్లు గురువారం రాత్రి అధికారికంగా ప్రకటించింది.

పిక్సెల్‌ ఫోల్డ్‌ (Pixel Fold) ఫోన్‌ ఎలా ఉండనుందో చూపిస్తూ ఓ వీడియో టీజర్‌ను గూగుల్‌ సామాజిక మాధ్యమాల్లో విడుదల చేసింది. దీనికి సంబంధించిన పూర్తి వివరాలను మే 10 నుంచి ప్రారంభం కానున్న వార్షిక సమావేశం ‘I/O 2023’లో వెల్లడించనున్నట్లు తెలిపింది. ఈ కార్యక్రమంలో పిక్సెల్‌ ఫోల్డ్‌ (Pixel Fold)తో పాటు పిక్సెల్‌ 7ఏ స్మార్ట్‌ఫోన్‌, పిక్సెల్‌ ట్యాబ్లెట్‌ను సైతం పరిచయం చేయనుంది.

పిక్సెల్‌ ఫోల్డ్‌ (Pixel Fold)కు సంబంధించిన వీడియో టీజర్‌ నిడివి చాలా తక్కువగా ఉన్నప్పటికీ.. ఫోన్‌కు సంబంధించిన చాలా విషయాలు తెలిసిపోతున్నాయి. ఫోన్‌ డిజైన్‌, హింజ్‌ సపోర్ట్‌, తెర, సాఫ్ట్‌వేర్‌, వెనుక మూడు కెమెరాలు, ఎల్‌ఈడీ ఫ్లాష్‌ లైట్‌ వంటి వివరాలు స్పష్టంగా కనిపిస్తున్నాయి. ఇంకా కచ్చితమైన స్పెసిఫికేషన్లు తెలియాలంటే మే 10 వరకు ఆగాల్సిందే.

ఇటీవల సామాజిక మాధ్యమాల్లో చక్కర్లు కొడుతున్న ఊహాగానాల ప్రకారం.. పిక్సెల్‌ ఫోల్డ్‌ (Pixel Fold) టెన్సర్‌ జీ2 ప్రాసెసర్‌తో రాబోతున్నట్లు సమాచారం. ఇదే ప్రాసెసర్‌ ఇప్పటికే పిక్సెల్‌ 7, పిక్సెల్‌ 7ప్రొ స్మార్ట్‌ఫోన్లలో ఉంది. 48 మెగాపిక్సెల్‌ కెమెరా ఉంటుందని అంచనా వేస్తున్నారు. సెల్ఫీల కోసం ఔటర్‌ డిస్‌ప్లేపై 9.5 మెగాపిక్సెల్‌, ఇన్నర్‌ డిస్‌ప్లేపై 8 మెగాపిక్సెల్‌ కెమెరా ఉండొచ్చని అంటున్నారు.