Nirmala Sitharaman: ధరల పెరుగుదలపై ప్రభుత్వం ఫోకస్‌: నిర్మలా సీతారామన్‌

జైపుర: ద్రవ్యోల్బణం (Inflation) కట్టడికి ప్రభుత్వం చర్యలు తీసుకుంటోందని, మున్ముందూ దృష్టి సారించనున్నామని కేంద్ర ఆర్థిక మంత్రి నిర్మలా సీతారామన్‌ (Nirmala Sitharaman) అన్నారు. పప్పు ధాన్యాల సాగును ప్రోత్సహించడంతో పాటు కొన్ని వస్తువులపై దిగుమతి సుంకాన్ని తగ్గించి వాటి అందుబాటును పెంచడం ఇందులో భాగమేనన్నారు. బడ్జెట్‌ అనంతరం జైపురలో భాగస్వామ్యపక్షాలతో సమావేశం అనంతరం విలేకరులతో మాట్లాడారు.

వస్తువుల ధరల పెరుగుదలను అదుపులోకి ఉంచడానికి పప్పు ధాన్యాల సాగును ప్రోత్సహిస్తున్నామని, రాబోయే సీజన్‌కు పంట చేతికి రానుందని నిర్మలా సీతారామన్‌ తెలిపారు. తాత్కాలికంగా కొరతను అధిగమించేందుకు కంది, పెసర వంటి పప్పు ధాన్యాల దిగుమతులపై సుంకాన్ని ఒక అంకెకు లేదా పూర్తిగానో తొలగించామని పేర్కొన్నారు. దీనివల్ల పప్పు ధాన్యాల లభ్యత పెరిగి.. అవి చౌకగా లభ్యమవ్వడానికి దోహదపడిందని మంత్రి తెలిపారు.

వంట నూనెలపై గడిచిన మూడేళ్లుగా దిగుమతి సుంకం సున్నాగా ఉందని నిర్మలా సీతారామన్‌ తెలిపారు. ముడి పామాయిల్‌, రిఫైన్డ్‌ పామాయిల్‌ తగినంతగా అందుబాటులోకి వచ్చిందని పేర్కొన్నారు. జనవరి నెలకు టోకు ధరల ద్రవ్యోల్బణం 4.73 శాతానికి తగ్గింది. ఇది రెండేళ్ల కనిష్ఠం కాగా.. రిటైల్‌ ద్రవ్యోల్బణం మూడు నెలల గరిష్ఠ స్థాయి పెరిగి 6.52 శాతంగా నమోదైంది. ఆర్‌బీఐ వడ్డీ రేట్లు పెంచినప్పటికీ రిటైల్‌ ద్రవ్యోల్బణం పెరగిన నేపథ్యంలో నిర్మలా సీతారామన్‌ దీనిపై స్పందించారు.