Union Budget 2022 | BSNLకు రూ.44,720 కోట్లు.. బడ్జెట్‌లో కేటాయించిన కేంద్రం

దిల్లీ: ప్రభుత్వరంగ టెలికాం కంపెనీ బీఎస్‌ఎన్‌ఎల్‌కు కేంద్రం బడ్జెట్‌లో రూ.44,720 కోట్లు కేటాయించింది. రాబోయే ఆర్థిక సంవత్సరానికి ఈ కేటాయింపులు జరుపుతున్నట్లు బడ్జెట్‌ ప్రతుల్లో పేర్కొంది. 4జీ స్పెక్ట్రమ్‌, సాంకేతికంగా అభివృద్ధి, బీఎస్‌ఎన్‌ఎల్‌ పునర్నిర్మాణానికి గానూ ఈ కేటాయింపులు జరిపినట్లు కేంద్రం పేర్కొంది.

దీంతో పాటు బీఎస్‌ఎన్‌ఎల్‌, ఎంటీఎన్‌ఎల్‌లో స్వచ్ఛంద పదవీ విరమణ పథకానికి (వీఆర్‌ఎస్‌) గానూ మరో రూ.7,443.57 కోట్లను కేంద్రం కేటాయించింది. జీఎస్టీ చెల్లింపుల కోసం గ్రాంట్‌ ఇన్‌ ఎయిడ్‌ కింద మరో రూ.3,550 కోట్లు ప్రత్యేకించింది. 4జీ స్పెక్ట్రమ్‌కు కేటాయించినందుకు గానూ జీఎస్టీ చెల్లింపుల కోసం ఈ మొత్తాన్ని సాయంగా కేంద్రం అందించనుంది. బీఎస్‌ఎన్‌ఎల్‌ పునరుద్ధరణ కోసం 2019 అక్టోబర్‌లో ప్రకటించిన రూ.69వేల కోట్ల ప్యాకేజీకి అదనంగా కేంద్రం ఈ కేటాయింపులు జరిపింది.