Adani Group: గౌతమ్‌ అదానీపై ఎంతో గౌరవం ఉంది: ఆస్ట్రేలియా మాజీ ప్రధాని అబాట్‌

దిల్లీ: అదానీ గ్రూప్‌ (Adani Group) అధినేత గౌతమ్‌ అదానీ (Gautam Adani)తో పాటు ఆయన కంపెనీల పట్ల తనకు ఎంతో గౌరవం ఉందని ఆస్ట్రేలియా మాజీ ప్రధాని టోనీ అబాట్ అన్నారు. హిండెన్‌బర్గ్‌ నివేదికలోని అంశాలు తనకు పూర్తిగా తెలియవని పేర్కొన్నారు. ఒకవేళ ఏమైనా అవతవకలు జరిగినా.. ఆ అంశాన్ని నియంత్రణా సంస్థలు చూసుకుంటాయని వ్యాఖ్యానించారు.

టోనీ అబాట్‌ తొలి నుంచి అదానీ గ్రూప్‌ (Adani Group) వ్యాపారాలకు మద్దతుగా నిలుస్తూ వస్తున్నారు. 2015లో ఆయన ప్రధాన మంత్రిగా ఉన్న సమయంలో ఆస్ట్రేలియాలోని అదానీ కార్మైకేల్‌ బొగ్గు గనుల ప్రాజెక్టులకు వ్యతిరేకంగా కోర్టు తీర్పు వెలువరించింది. అప్పట్లో ఆయన న్యాయస్థానం తీర్పును ఖండిస్తూ అదానీ కంపెనీకి అండగా నిలిచారు. ప్రస్తుతం ఆ బొగ్గు గనులే భారత్‌లో విద్యుదీకరణకు దోహదం చేస్తున్నట్లు అబాట్‌ అన్నారు.

‘‘అదానీ గనులకు నేను పూర్తి మద్దతునిస్తున్నాను. అదానీ, ఆయన బృందానికి కృతజ్ఞతలు తెలియజేస్తున్నాను. వారు భారత్‌కు విద్యుత్‌ను.. ఆస్ట్రేలియాకు ఉద్యోగాలను అందిస్తున్నారు’’ అని అబాట్‌ అన్నారు. 2015లో స్థానిక న్యాయస్థానమొకటి అదానీ కార్మైకేల్‌ గనుల పర్యావరణ అనుమతులను రద్దు చేసింది. దీన్ని ఖండించిన అబాట్‌ ఇలాంటి పెద్ద ప్రాజెక్టులకు న్యాయపరమైన అడ్డంకులు సృష్టించడం వల్ల విస్తృతస్థాయి ప్రయోజనాలు దెబ్బతింటాయన్నారు. ఎట్టకేలకు 2019లో అదానీ గ్రూప్‌నకు తుది అనుమతులు లభించాయి. అక్కడి నుంచి వెలికితీసిన బొగ్గునే ఇప్పుడు అదానీ గ్రూప్‌ భారత్‌కు సరఫరా చేస్తోంది.