Hero Electric SBI: హీరో ఎలక్ట్రిక్‌ వినియోగదారులకు ఎస్‌బీఐ రుణాలు!

దిల్లీ: తమ వినియోగదారులకు రిటైల్‌ రుణాలు అందించేందుకు వీలుగా ప్రముఖ విద్యుత్తు వాహన తయారీ సంస్థ హీరో ఎలక్ట్రిక్‌.. బ్యాంకింగ్‌ దిగ్గజం ఎస్‌బీఐతో చేతులు కలిపింది. తక్కువ వడ్డీరేటుకు, ఎలాంటి చిక్కులు లేకుండా ఇకపై హీరో ఎలక్ట్రిక్ వాహనాల (EV)ను సొంతం చేసుకోవచ్చని కంపెనీ ఓ ప్రకటనలో పేర్కొంది. విద్యుత్తు వాహనాలకు గిరాకీ పుంజుకుంటున్న నేపథ్యంలో వినియోగదారులకు సహాయంగా ఈ నిర్ణయం తీసుకున్నట్లు తెలిపింది. ఈవీలను కొనుగోలు చేయాలనుకుంటున్నవారు ఆకర్షణీయమైన ఆఫర్లు, పథకాల కోసం చూస్తున్నారని అభిప్రాయపడింది.

దీనిపై ఎస్‌బీఐ చీఫ్‌ జనరల్‌ మేనేజర్‌ దేవేంద్ర కుమార్‌ మాట్లాడుతూ... భారత్‌ను స్వచ్ఛ ఇంధనం వైపు నడపడంలో తమ వంతు కృషిగా ఈ నిర్ణయం తీసుకున్నామని తెలిపారు. తక్కువ ఈఎంఐలతో విద్యుత్తు వాహనాలు ప్రజలకు మరింత అందుబాటు ధరల్లో చేరువ కానున్నాయన్నారు.