Vida V1: హీరో మోటాకార్ప్‌ తొలి ఈవీ.. విడా వీ1 డెలివరీలు షురూ..!

దిల్లీ: ప్రముఖ ద్విచక్ర వాహన తయారీ సంస్థ హీరో మోటార్‌ కార్ప్‌ (Hero MotoCorp) తొలి ఎలక్ట్రిక్‌ స్కూటర్  విడా వీ1 (VIDA V1)  డెలివరీలను శుక్రవారం ప్రారంభించింది.  మొదటి స్కూటర్‌ను బెంగళూరు షోరూంలో కొనుగోలుదారులకు అందించింది.  దిల్లీ, జయపుర నగరాల్లో కూడా ముందుస్తుగా బుకింగ్ చేసుకున్న వినియోగదారులకు వీటిని అందిచనున్నారు. హీరో మోటార్‌కార్ప్‌ ఈవీ విభాగం నుంచి వస్తోన్న తొలి ఎలక్ట్రిక్‌ స్కూటర్‌ ఇదే.

‘‘భవిష్యత్తు రవాణా అవసరాలకు తగినట్లుగా, వినియోగదారులకు లబ్ధిచేకూర్చేలా.. పర్యావరణానికి హాని కలిగించని వాహనాలు తయారు చేయడం విడా లక్ష్యం. ఈ రోజు వినియోగదారులకు విడా వీ1 వాహనాలు అందించడం ద్వారా ఆ లక్ష్యాన్ని చేరుకోగలిగామని భావిస్తున్నాం’’ అని హీరో మోటార్‌కార్ప్‌ ఛైర్మన్‌, సీఈవో పవన్‌ ముంజాల్‌ ఈ సందర్భంగా తెలిపారు.

హీరో మోటాకార్ప్‌ ఈ ఏడాది అక్టోబరులో విడా వీ1 ఎలక్ట్రిక్‌ స్కూటర్‌ను భారత మార్కెట్లోకి విడుదల చేసింది. ఇందులో రిమూవబుల్ బ్యాటరీ ఇస్తున్నారు. దీన్ని మూడు వేర్వేరు పద్ధతుల్లో ఛార్జింగ్ చేసుకోవచ్చు. బ్యాటరీని ఒక్కసారి ఛార్జ్‌ చేస్తే 163 కిలోమీటర్లు ప్రయాణం చేయొచ్చు. ఈ స్కూటర్‌ అత్యధికంగా 80 కిలోమీటర్ల వేగంతో ప్రయాణిస్తుంది. రెండు వేరియంట్లలో ఈ స్కూటర్‌ను తీసుకొచ్చారు. విడా వీ1ప్లస్‌ ధర ₹ 1.35 లక్షలు, విడా వీ1 ప్రో ధర ₹ 1.46 లక్షలుగా కంపెనీ నిర్ణయించింది.