Honda Price Hike: హోండా కార్ల ధరలు రూ.30,000 వరకు పెంపు

దిల్లీ: హోండా ఇండియా (Honda India) తమ కార్ల ధరల్ని జనవరి నుంచి పెంచుతున్నట్లు శుక్రవారం ప్రకటించింది. మోడల్‌ను బట్టి పెంపు (Price Hike) రూ.30,000 వరకు ఉంటుందని తెలిపింది. ఉత్పత్తి వ్యయాలు పెరుగుతున్న కారణంగా ఈ నిర్ణయం తీసుకుంటున్నామని పేర్కొంది. దీంతో కొత్త ఏడాదిలో ధరలు పెంచనున్న మారుతీ సుజుకీ, హ్యుందాయ్‌, టాటా మోటార్స్‌, మెర్సిడెస్‌ బెంజ్‌, ఆడి, రెనో, కియా ఇండియా, ఎంజీ మోటార్‌ సరసన హోండా కూడా చేరింది.

ముడి సరకుల ధరలు పెరగడం, కొత్త ఉద్గార ప్రమాణాల అమలు వంటి వాటితో తయారీ వ్యయాలు గణనీయంగా పెరిగినట్లు హోండా కార్స్‌ (Honda Cars) ఇండియా ఉపాధ్యక్షుడు కునాల్‌ బెల్‌ తెలిపారు. ఈ నేపథ్యంలో కొంత వ్యయభారాన్ని వినియోగదారులకు బదిలీ చేయాలని నిర్ణయించినట్లు పేర్కొన్నారు. ఏప్రిల్‌ 2023 నుంచి వాహన తయారీ సంస్థలు బీఎస్‌-6 (BS-IV) రెండో దశ ఉద్గార ప్రమాణాలను అమలు చేయాల్సి ఉంది.

ఇందులో భాగంగా ఎప్పటికప్పుడు ఉద్గారాల స్థాయిని గుర్తించగలిగే పరికరాలను వాహనాల్లో పొందుపర్చాల్సి ఉంటుంది. ఇవి కీలక భాగాలైన కేటలైటిక్‌ కన్వర్టర్‌, ఆక్సిజన్‌ సెన్సార్ల ద్వారా ఉద్గారాల స్థాయిని అంచనా వేస్తుంది. అలాగే మండే ఇంధన స్థాయిని సైతం నియంత్రించేలా ప్రత్యేకంగా ప్రోగ్రామ్‌ చేసిన ఇంజెక్టర్లను అమర్చాల్సి ఉంటుంది. సెమీకండక్టర్లను సైతం మరింత మెరుగుపర్చాల్సి వస్తుంది.