ఇళ్ల అమ్మకాల జోరు హైదరాబాద్‌లోనే

జనవరి-మార్చిలో 38% వృద్ధి
దేశ వ్యాప్తంగా 5 శాతం క్షీణత
ప్రాప్‌టైగర్‌ నివేదిక

దిల్లీ: కరోనా మహమ్మారి ప్రభావం ఉన్నా, హైదరాబాద్‌లో ఇళ్లు కొనుగోలు చేసే వారి సంఖ్య భారీగా పెరిగిందని స్థిరాస్తి బ్రోకరేజీ సంస్థ ప్రాప్‌టైగర్‌ వెల్లడించింది. 2020 జనవరి-మార్చిలో 5,554 ఇళ్లు/ఫ్లాట్లు విక్రయం కాగా, ఈ ఏడాది ఇదే సమయంలో 38 శాతం పెరిగి 7,721కు చేరాయని తెలిపింది. ఈ కాలంలోనే దేశ వ్యాప్తంగా ఇళ్ల అమ్మకాలు 5 శాతం క్షీణించాయని పేర్కొంది. 8 పెద్ద నగరాల్లో గృహ విక్రయాల తీరుతెన్నులపై ప్రాప్‌టైగర్‌ నివేదిక రూపొందించింది. 2021 జనవరి-మార్చి  లో దేశ వ్యాప్తంగా 66,176 ఇళ్లు/ఫ్లాట్లు విక్రయమయ్యాయి. ఏడాది క్రితం ఈ సంఖ్య 69,555 అని పేర్కొంది. అయితే ఈ 8 నగరాల్లో అమ్మకాలు 29 శాతం పెరిగాయని అనరాక్, 44 శాతం వృద్ధితో సాగాయని పేర్కొంటూ నైట్‌ఫ్రాంక్‌ సంస్థలు ఇటీవల విడుదల చేసిన నివేదికలతో పోలిస్తే ఇది పూర్తి భిన్నంగా ఉంది.