SBI: ఓటీపీ ఆధారిత ఏటీఎమ్ క్యాష్ విత్‌డ్రా ఎలా ప‌నిచేస్తుంది?

ఇంటర్నెట్‌ డెస్క్: స్టేట్‌ బ్యాంక్ ఆఫ్ ఇండియా (ఎస్‌బీఐ) ఖాతాదారుల కోసం ఓటీపీ (వన్ టైమ్ పాస్‌వ‌ర్డ్‌) ఆధారిత ఏటీఎమ్ విత్‌డ్రాల‌ను అందిస్తోంది. జన‌వ‌రి 2020 నుంచి ఈ సేవలు అందుబాటులో ఉన్నాయి. ₹10 వేలు అంత‌కంటే ఎక్కువ విలువ గ‌ల లావాదేవీల‌కు డెబిట్ కార్డు పిన్ నంబ‌రుతో పాటు రిజిస్ట‌ర్డ్ మొబైల్ నంబ‌రుకు బ్యాంకు పంపిన ఓటీపీనీ ఎంట‌ర్ చేయాలి. 

ఏటీఎమ్ నుంచి ఓటీపీ ద్వారా న‌గ‌దు విత్‌డ్రా చేసుకునే విధానం..

• ఎస్‌బీఐ ఏటీఎమ్‌ల వ‌ద్ద నగ‌దు విత్‌డ్రా చేసుకునేందుకు ఓటీపీ అవ‌స‌రం. న‌గ‌దు విత్‌డ్రా స‌మ‌యంలో బ్యాంకు మీ రిజిస్ట‌ర్డ్ మొబైల్ నెంబ‌రుకు ఓటీపీ పంపిస్తుంది.
• ఓటీపీ అనేది నాలుగు అంకెల నంబ‌రు. దీంతో ఒకసారి ఒక లావాదేవీ మాత్ర‌మే చేయ‌గ‌ల‌రు. 
• ఒక‌సారి మీరు కావాల్సిన నగదు మొత్తాన్ని ఏటీఎమ్ స్క్రీన్‌పై ఎంట‌ర్ చేసిన త‌ర్వాత ఓటీపీ స్క్రీన్ క‌నిపిస్తుంది.
• మీ మొబైల్ నంబ‌రుకి వ‌చ్చిన ఓటీపీని ఎంట‌ర్ చేసి న‌గ‌దు విత్‌డ్రా చేసుకోవ‌చ్చు. 

ఏటీఎమ్‌ల వ‌ద్ద జ‌రిగే మోసాలకు చెక్ పెట్టేందుకు ఏటీఎమ్‌ల‌ ద్వారా కార్డ్ ర‌హిత‌ నగదు ఉపసంహరణలు చేసుకునేలా భారతీయ రిజర్వ్ బ్యాంక్ (ఆర్‌బీఐ) ఈ సదుపాయం తీసుకొచ్చింది. అన్ని బ్యాంకులు ఈ సౌకర్యాన్ని అందించాలని సూచించింది. యూపీఐ వ్యవస్థను ఉపయోగిస్తున్న అన్ని బ్యాంకులు, ఏటీఎంలలో కార్డ్‌లెస్‌ క్యాష్‌ విత్‌డ్రా సదుపాయం కల్పించనున్న‌ట్లు ఆర్‌బీఐ తెలిపింది. ఈ విధానం ద్వారా భౌతికంగా కార్డులు లేకున్నా సుల‌భంగా న‌గ‌దు ఉప‌సంహ‌రించుకోవ‌చ్చు. అలాగే కార్డ్ స్కిమ్మింగ్‌, క్లోనింగ్ వంటి మోసాల‌ను అడ్డుకోవ‌చ్చ‌ని ఆర్‌బీఐ ఉద్దేశం.