‘ITR ఎలా ఫైల్‌ చేయాలి?’.. గూగుల్‌లో ఈ ఏడాది తెగ వెతికారు!

ఇంటర్నెట్‌ డెస్క్‌: ఈ ఏడాది గూగుల్‌లో  (Google) ఎక్కువ మంది వెతికిన వాటిలో ఐటీఆర్‌ (ITR) సైతం నిలిచింది. ‘ఐటీఆర్ ఆన్‌లైన్‌లో ఎలా ఫైల్ చేయాలి’ అనేది ఈ ఏడాది ఎక్కువమంది శోధించారని ‘ఇయర్ ఇన్ సెర్చ్ 2022’ నివేదికలో గూగుల్‌ తెలిపింది. జులై 24, జులై 30 మధ్య ఎక్కువ శోధనలు ఉన్నాయని గూగుల్‌ ట్రెండ్‌ డేటా చూపిస్తోంది. సాధారణంగా ఐటీఆర్‌ ఫైలింగ్‌కు గడువు తేదీ జులై 31. ఈ ఏడాది గడువు పొడిగించేందుకు ప్రభుత్వం నిరాకరించడంతో 2022-23కి ఐటీఆర్‌  ఫైలింగ్ గడువు తేదీ జులై 31తోనే ముగిసింది.

అయితే ఐటీఆర్‌ను ఇప్పటి వరకు దాఖలు చేయకపోతే కొంత జరిమానాతో 2022 డిసెంబరు 31లోపు ఫైల్‌ చేయవచ్చు. ఒకవేళ ఐటీఆర్‌ను ఇప్పటికే దాఖలు చేసినా తప్పులు ఉంటే ఈ తేదీలోపు రివైజ్డ్‌ ఐటీఆర్‌ను సమర్పించవచ్చు. ఈ తేదీలోపు ఐటీఆర్‌ను సమర్పించకపోతే ఐటీశాఖ నుంచి నోటీసులు అందుతాయి. ఈ నేపథ్యంలో ఆదాయపు పన్ను రిటర్నులను ఆన్‌లైన్‌లో ఏవిధంగా ఫైల్‌ చేయాలో ఇప్పుడు చూద్దాం.

ఆన్‌లైన్‌లో ఐటీఆర్‌ దాఖలు చేసే విధానం..

• ముందుగా ఆదాయపు పన్ను శాఖ వైబ్‌సైట్‌ను సందర్శిచాలి. ఈ లింక్‌ని క్లిక్‌ చేయడం ద్వారా నేరుగా వెబ్‌సైట్‌కు వెళ్లొచ్చు.   
• పాన్‌/ఆధార్‌తో ఇ-ఫైలింగ్‌ పోర్టల్‌కు లాగిన్‌ అవ్వాలి.
• ఫైల్‌ రిటర్న్‌పై క్లిక్‌ చేయాలి.
• ఇక్కడ ఫైలింగ్‌ మోడ్‌ను, అసెస్మెంట్‌ సంవత్సరం ఎంపిక చేసుకోవాలి.
• అన్ని సూచనలను (ఆదాయం, స్టేటస్‌, ఇతర వివరాలు) అనుసరించి, సరైన ఐటీఆర్‌ ఫారంను ఎంచుకోవాలి (జీతం ద్వారా ఆదాయం పొందుతున్న వ్యక్తులు ఐటీఆర్‌-1 ఎంచుకోవాలి).
• రిటర్నులు దాఖలు చేయడానికి గల కారణాన్ని ఎంపిక చేసుకుని ఫారంలో ముందుగా నింపి ఉన్న సమాచారాన్ని ధ్రువీకరించాలి. ఫారం 16 ద్వారా మీ సంస్థ ఆదాయపు పన్ను శాఖకు అందించిన వివరాలన్నీ ఇందులో ఉంటాయి.
• అవసరమైతే ముందుగానే నింపిన ఫారంలో మార్పులు చేసుకోవచ్చు.
• ఐటీఆర్‌ వెరిఫై చేసిన తర్వాత సమర్పించి రీఫండ్ (మీరు ఏడాదిలో చెల్లించిన పన్ను చెల్లించాల్సిన దానికంటే ఎక్కువ ఉన్నట్లయితే) కోసం వేచి చూడాలి. 

ఆదాయపు పన్ను అధికారిక డేటా ప్రకారం... మదింపు సంవత్సరం 2022-23 కోసం ఇప్పటివరకు 6,99,87,701 ఐటీఆర్‌లు ఫైల్ చేశారు. వీటిలో 6.62 కోట్ల ఐటీఆర్‌లు వైరిఫై కాగా..6.37 కోట్ల కంటే ఎక్కువ రిటర్నులను పన్ను శాఖ ప్రాసెస్‌ చేసింది. అసెస్మెంట్‌ సంవత్సరం 2023-24కు సంబంధించి ఐటీఆర్‌ దాఖలు చేసేందుకు చివరి తేది 2023 జులై 31.