సిస్టమ్యాటిక్ విత్ డ్రావల్ ప్లాన్ (ఎస్డబ్ల్యూపీ) అనేది సిస్టమ్యాటిక్ ఇన్వెస్ట్మెంట్ ప్లాన్ కి వ్యతిరేకంగా ఉంటుంది

8 సెప్టెంబర్ 2018 మధ్యాహ్నం 11:21

ఈ తరానికి చెందిన చాలామంది తమ తల్లిదండ్రులకు వృధాప్యంలో ఆర్ధికంగా మద్దతు ఇవ్వాలని భావిస్తుంటారు. కానీ దానికి కావలసిన మొత్తాన్ని కూడపెట్టడంలో మాత్రం విఫలమవుతుంటారు. తల్లిదండ్రులకు అవసరమయ్యే ఆర్థిక సహాయ పరిమాణాన్ని అంచనా వేయడానికి పొదుపు, పెట్టుబడులు, ఖర్చుల గురించి స్పష్టమైన అవగాహన కలిగి ఉండడం అవసరం. మొదటగా మీ తల్లిదండ్రులు పెట్టుబడి పెట్టిన వివిధ సాధనాల వివరాలను, వారు తీసుకున్న బీమా వివరాలను, వారి పేరు మీద ఉన్న రుణాలను గుర్తించండి. వారి నెలవారీ ఖర్చుల విషయానికి వస్తే, పదవీ విరమణ తరువాత వారి జీవితం సాఫీగా సాగడానికి అవసరమయ్యే మొత్తాన్ని అంచనా వేయడానికి ఆన్ లైన్ కాలిక్యులేటర్లను ఉపయోగించవచ్చు. ఒకవేళ వారు పదవీ విరమణ చేయడానికి కొన్ని సంవత్సరాల సమయం ఉన్నట్లయితే, పదవీ విరమణ కోసం మెరుగైన ఆర్థిక ప్రణాళికను రూపొందించుకోవడంలో వారికి సహాయపడండి.

త్వరగా ప్రారంభించండి:

జీవితంలో ఏదో ఒక సమయంలో మీ తల్లిదండ్రులకు మద్దతు ఇవ్వాల్సిన అవసరం ఉంటుందని తెలుసుకున్నట్లైతే, చిన్న వయసులోనే పెట్టుబడి మొదలు పెట్టడం మంచిది. ఈక్విటీ మ్యూచువల్ ఫండ్స్ వంటి వృద్ధి చెందే సాధనలలో సిస్టమ్యాటిక్ ఇన్వెస్ట్మెంట్ ప్లాన్ (SIP) ద్వారా పెట్టుబడి పెట్టడం మంచిది. దీర్ఘకాలంలో ఈక్విటీలు ద్రవ్యోల్బణాన్ని అధిగమించే రాబడులను అందిస్తాయి. మ్యూచువల్ ఫండ్స్ ద్వారా పెట్టుబడి పెట్టడం వలన నష్ట భయం తక్కువగా ఉంటుంది.

ప్రణాళికను రూపొందించుకోండి:

ప్రస్తుత మీ ఆర్ధిక పరిస్థితి, మీ తల్లిదండ్రుల భవిష్యత్తు అవసరాలకు అనుగుణంగా మీ ఆర్థిక ప్రణాళికను రూపొందించుకోండి. మొదటగా మీ సొంత అవసరాలకు కావలసిన మొత్తాన్ని గుర్తించడం ద్వారా మీ తల్లిదండ్రుల భవిష్యత్తు అవసరాల కోసం పక్కన పెట్టాల్సిన మొత్తంపై అవగాహాన కలిగి ఉంటారు. అప్పుడు కార్పస్ ను సమకూర్చుకోడానికి అవసరమయ్యే సాధనలలో ఈ మొత్తాన్ని పెట్టుబడిగా పెట్టవచ్చు.

ఎస్డబ్ల్యూపీ ని ఎంపిక చేయండి:

సిస్టమ్యాటిక్ విత్ డ్రావల్ ప్లాన్ (ఎస్డబ్ల్యూపీ) అనేది సిస్టమ్యాటిక్ ఇన్వెస్ట్మెంట్ ప్లాన్ కి వ్యతిరేకంగా ఉంటుంది. పెట్టుబడిదారులు ముందే నిర్వచించిన డబ్బును క్రమ పద్ధతిలో పథకం నుంచి వెనక్కి తీసుకోవచ్చు. ఇది మీ తల్లిదండ్రులకు అదనపు నగదు ప్రవాహాన్ని ఉత్పత్తి చేయడానికి సహాయపడుతుంది. మీ తల్లిదండ్రులు క్రమ పద్ధతిలో ముందే నిర్వచించిన మొత్తాన్ని పొందుతున్నప్పుడు, పథకంలోని మిగిలిన మొత్తం అధిక రాబడులను సంపాదిస్తుంది.

వైద్య అవసరాల కోసం నిధి:

వృద్ధాప్యంలో ఉన్న తల్లిదండ్రుల సంరక్షణ విషయానికి వస్తే, ఆదాయంలో ప్రధాన భాగాన్ని వారి వైద్య అవసరాల కోసం కేటాయించాల్సి వస్తుంది.
మీ తల్లిదండ్రులకు 50 సంవత్సరాల వయస్సు రాకముందే ఆరోగ్య బీమాను కొనుగోలు చేయడం మంచిది. ఒకవేళ 50 సంవత్సరాల వయస్సు దాటి, ఎలాంటి ఆరోగ్య బీమా లేకపోతే, అప్పుడు ఫ్లోటర్ పాలసీ, ప్రత్యేక సీనియర్ సిటిజన్స్ ప్లాన్స్ వంటి ఒప్షన్స్ కోసం అన్వేషించండి.