ఎఫ్‌డీలపై వడ్డీ రేట్లను పెంచిన ఐసీఐసీఐ

ఇంటర్నెట్‌ డెస్క్‌: ఐసీఐసీఐ బ్యాంకు ఎంపిక చేసిన కాలవ్యవధులపై 50 బేసిస్‌ పాయింట్ల వరకు వడ్డీ రేట్లను పెంచింది. 7 రోజుల నుంచి 10 సంవత్సరాల మధ్య డిపాజిట్‌ చేసే సాధారణ డిపాజిటర్లకు 3% నుంచి 7.10% వరకు వడ్డీ రేట్లను బ్యాంకు అందిస్తోంది. ఇప్పుడు సాధారణ డిపాజిటర్లు 7 రోజుల నుంచి 14 రోజుల వరకు కనిష్ఠంగా 3% వడ్డీని అందుకుంటారు. 15 నుంచి 18 నెలల డిపాజిట్లపై గరిష్ఠంగా 7.10% వడ్డీని పొందుతారు. ఇవే కాలవ్యవధులకు సీనియర్‌ సిటిజన్లు అదనంగా 0.50% వడ్డీని అందుకుంటారు. అంటే సీనియర్‌ సిటిజన్లు గరిష్ఠంగా 7.60% వరకు వడ్డీని పొందుతారు.

పన్ను ఆదా చేసే ఫిక్స్‌డ్‌ డిపాజిట్లపై బ్యాంకు సాధారణ పౌరులకు 7% వడ్డీ రేటును అందిస్తోంది. ఐసీఐసీఐ బ్యాంకు ‘గోల్డెన్‌ ఇయర్స్‌’ ఎఫ్‌డీ కింద సీనియర్‌ సిటిజన్లు 5 సంవత్సరాల ఒక రోజు నుంచి 10 సంవత్సరాల మధ్య మెచ్యూర్‌ అయ్యే ఎఫ్‌డీలపై ప్రస్తుతం 0.50% అదనపు వడ్డీ రేటుతో పాటు ఇంకా 0.10% అదనపు వడ్డీ రేటును పొందుతారు. ఈ పథకం 2023 ఏప్రిల్‌ 7 వరకు అందుబాటులో ఉంటుంది. కొత్త ఎఫ్‌డీ రేట్లు 2023 ఫిబ్రవరి 24 నుంచి అమల్లోకి వస్తాయి. రూ.2 కోట్ల వరకు రిటైల్‌ డిపాజిట్లపై ఈ వడ్డీ రేట్లు వర్తిస్తాయి.