India-Malaysia: మలేషియాతో వాణిజ్యం.. ఇక మన రూపాయల్లోనూ..

India-Malaysia Trade: మలేసియాతో ఎగుమతులు/దిగుమతుల ఇన్‌వాయిసింగ్‌, చెల్లింపులు, సెటిల్‌మెంట్‌లు ఇకపై మన రూపాయల్లో (Indian Rupee) జరగనున్నాయి. ఈ మేరకు ఇరు దేశాల మధ్య ఒప్పందం కుదిరింది.

Published : 01 Apr 2023 13:58 IST

దిల్లీ: అంతర్జాతీయ వాణిజ్యంలో (International Trade) దేశీయ కరెన్సీ రూపాయి (Indian Rupee)కి ఆదరణ పెరుగుతోంది. భారత్‌తో ద్వైపాక్షిక వాణిజ్యాన్ని రూపాయల్లో చేయడానికి చాలా దేశాలు ఆసక్తికనబరుస్తున్నాయి. ఇప్పటికే రష్యా, మారిషస్‌, శ్రీలంకలతో ఎగుమతి - దిగుమతి లావాదేవీలు రూపాయల్లో చేస్తుండగా.. తాజాగా ఈ జాబితాలో మలేషియా (Malaysia) కూడా చేరింది. ఇక భారత్‌, మలేషియా మధ్య ట్రేడ్‌ సెటిల్‌మెంట్‌లు ఇతర కరెన్సీలతో పాటు రూపాయల్లోనూ జరుగుతాయని కేంద్ర విదేశీ వ్యవహారాల మంత్రిత్వ శాఖ వెల్లడించింది. ఈ మేరకు శనివారం ఓ ప్రకటన విడుదల చేసింది. (India-Malaysia Trade)

‘‘అంతర్జాతీయ చెల్లింపులను (International Trade Settlements) రూపాయల్లో చేసేందుకు వీలుగా గతేడాది జులైలో ఆర్‌బీఐ (RBI) అనుమతులిచ్చింది. అందుకు అనుగుణంగా.. ఇప్పుడు మలేషియాతో వాణిజ్యం ప్రస్తుతమున్న కరెన్సీలతో పాటు రూపాయల్లోనూ జరగనుంది. ఇందుకోసం కౌలాలంపూర్‌లోని ఇండియా ఇంటర్నేషనల్‌ బ్యాంక్ ఆఫ్‌ మలేషియా (IIBM), భారత్‌లోని యూనియన్‌ బ్యాంక్‌ ఆఫ్‌ ఇండియాతో కలిసి ప్రత్యేక రూపీ వోస్ట్రో ఖాతాలను అందుబాటులోకి తెచ్చింది’’ అని విదేశాంగ శాఖ వెల్లడించింది. దీంతో ఇరు దేశాల మధ్య ఇకపై ఎగుమతులు/దిగుమతుల ఇన్‌వాయిసింగ్‌, చెల్లింపులు, సెటిల్‌మెంట్‌ మన రూపాయల్లోనూ జరగనున్నాయి.

లావాదేవీలు ఇలా..

దేశీయ కరెన్సీలో క్రాస్‌-బోర్డర్‌ వాణిజ్య లావాదేవీలకు సంబంధించిన సవివర మార్గదర్శకాలను ఆర్‌బీఐ (RBI) గతేడాది జులైలో జారీ చేసిన సంగతి తెలిసిందే. రూపాయల్లో వాణిజ్య లావాదేవీల సెటిల్‌మెంట్‌ కోసం, భాగస్వామి వాణిజ్య దేశానికి చెందిన బ్యాంకుల్లో రూపీ వోస్ట్రో (Rupee Vostro) ఖాతాలతో ప్రత్యేక వ్యవస్థను తీసుకొస్తారు. దేశీయ దిగుమతిదార్లు ఈ వ్యవస్థ ద్వారా చేసుకునే దిగుమతుల కోసం, వోస్ట్రో ఖాతాలకు రూపాయల్లో చెల్లింపు చేస్తారు. ఎగుమతిదార్లు విదేశాలకు ఎగుమతి చేసిన వస్తువులు, సేవలకు కూడా ఈ వ్యవస్థలో వోస్ట్రో ఖాతాల నుంచి రూపాయల్లోనే నిధులు అందుకుంటారు. విదేశీ కొనుగోలుదార్ల నుంచి భారతీయ ఎగుమతిదార్లు ముందస్తుగా సొమ్ము పొందే వెసులుబాటు కూడా ఇందులో ఉంది. రూపాయి మిగులు బ్యాలెన్స్‌ను పరస్పర ఒప్పందం ప్రకారం, అనుమతించదగిన మూలధనం, కరెంట్‌ ఖాతా లావాదేవీల కోసం వినియోగించుకోవచ్చని ఆర్‌బీఐ అప్పుడు వెల్లడించింది.


Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని