Wheat Flour Exports: గోధుమ పిండి ఎగుమతులపై ఆంక్షలు

దిల్లీ: మే నెలలో గోధుమల ఎగుమతులపై విధించిన ఆంక్షల్ని తాజాగా కేంద్ర ప్రభుత్వం దాని ఉత్పత్తులకూ విస్తరించింది. గోధుమ పిండి, మైదా, రవ్వ సహా ఇతర గోధుమ ఆధారిత ఉత్పత్తుల ఎగుమతులకు ముందస్తు అనుమతిని తప్పనిసరి చేసింది. ఈ మేరకు డైరెక్టరేట్‌ జనరల్‌ ఆఫ్‌ ఫారెన్‌ ట్రేడ్‌ (DGFT) గురువారం ఉత్తర్వులు జారీ చేసింది. జులై 12 నుంచి ఈ ఆంక్షలు అమల్లోకి రానున్నట్లు స్పష్టం చేసింది. ప్రపంచవ్యాప్తంగా గోధుమల సరఫరాలో వచ్చిన ఇబ్బందుల నేపథ్యంలో ధరలు విపరీతంగా పెరిగాయని డీజీఎఫ్‌టీ పేర్కొంది. ఫలితంగా నాణ్యతలోనూ సమస్యలు వస్తున్నట్లు తెలిపింది. ఈ నేపథ్యంలోనే తాజా ఉత్తర్వులు జారీ చేయాల్సి వస్తోందని వివరించింది. గోధుమ పిండి ఎగుమతులపై పూర్తిస్థాయి నిషేధం లేదని.. ముందస్తు అనుమతి మేరకే ఎగుమతి చేయాల్సి ఉంటుందని స్పష్టం చేసింది. ఈ ఉత్తర్వుల జారీకి ముందే ఎగుమతులకు సిద్ధంగా ఉన్న గోధుమ ఉత్పత్తులకు మాత్రం ఈ ఆంక్షలు వర్తించవని తెలిపింది.