T+1 Settlement: షేర్ల ట్రేడింగ్‌ లావాదేవీలలో కొత్త విధానం

ముంబయి: భారతీయ స్టాక్‌ మార్కెట్‌ (Stock Markets)లు శుక్రవారం నుంచి షేర్‌ ట్రేడింగ్‌ లావాదేవీలకు సంబంధించి కొత్త విధానాన్ని అమలు చేయనున్నాయి. దీంతో ట్రేడర్ల లావాదేవీ పూర్తయిన 24 గంటల వ్యవధిలోపు T+1 (Trade Plus One) విధానంలో సెటిల్‌మెంట్‌ జరుగుతుంది. దీనివల్ల ఇన్వెస్టర్ల మార్కెట్లో పెట్టుబడులు మరింత వేగంగా జరుగుతాయని మార్కెట్‌ నిపుణులు అభిప్రాయపడుతున్నారు. గతంలో ట్రేడింగ్​ పూర్తయిన రోజు నుంచి మూడు రోజులకు అంటే T+3 విధానంలో సెటిల్ చేసేవారు. తర్వాత 2003లో ఈ వ్యవధిని T+2 అంటే రెండు రోజులకు తగ్గించారు. తాజాగా T+1 విధానం ద్వారా ఒక రోజుకు పరిమితం చేయనున్నారు.

భారతీయ స్టాక్‌ మార్కెట్‌లు ఎన్‌ఎస్‌ఈ, బీఎస్‌ఈ (NSE, BSE)లు 2021 నవంబరులో T+1 విధానం గురించి ప్రకటించాయి. ఈ మేరకు ఫిబ్రవరి 25, 2022 నుంచి తొలి దశలో భాగంగా మార్కెట్‌ విలువ తక్కువగా ఉండి, స్టాక్‌ మార్కెట్‌లో కింద నుంచి 100 స్థానాల్లో ఉన్న కంపెనీల షేర్లకు ఈ విధానాన్ని అమలు చేయనున్నట్లు వెల్లడించాయి. తర్వాత మార్చి 2022 నుంచి ప్రతి నెలా చివరి శుక్రవారం మార్కెట్‌ విలువ పరంగా కింది నుంచి తర్వాతి 500 స్థానాల్లో ఉన్న షేర్లకు ఈ విధానాన్ని అమలు చేశాయి.

ఈ పద్ధతిలో స్టాక్‌ ఎక్స్ఛేంజీల్లో నమోదైన అన్ని కంపెనీలకు దశల వారీగా ఈ విధానాన్ని అమలు చేస్తామని తెలిపాయి. ఈ ప్రక్రియ శుక్రవారంతో (జనవరి 27, 2023) పూర్తవుతుండటంతో రేపటి నుంచి స్టాక్‌ ఎక్స్ఛేంజీల్లోని అన్ని షేర్లకు T+1  విధానం అమలుకానుంది. సెటిల్‌మెంట్‌లో ఈ తరహా విధానం అమలు చేయడం ఇదేం తొలిసారి కాదు. 2002లో సెబీ T+5 నుంచి T+3కి, 2003లో T+2కి తగ్గించింది.