India GDP: ఈ ఏడాది జీడీపీ వృద్ధి 7 శాతం: NSO

దిల్లీ: ప్రస్తుత ఆర్థిక సంవత్సరం (2022-23)లో జీడీపీ (GDP) 7 శాతం వృద్ధి నమోదు కావొచ్చని కేంద్ర గణాంక కార్యాలయం వెల్లడించింది. గతేడాది 8.7 శాతంతో పోలిస్తే ఈ సారి తక్కువ వృద్ధి నమోదు కానుండడం గమనార్హం. మైనింగ్‌, తయారీ రంగంలో వృద్ధి తగ్గుముఖం పట్టడమే దీనికి కారణం. ఈ మేరకు కేంద్ర గణాంక కార్యాలయం (NSO) శుక్రవారం తన తొలి ముందస్తు అంచనాలను వెలువరించింది. రిజర్వ్‌ బ్యాంక్‌ ఆఫ్‌ ఇండియా (RBI) వెలువరించిన 6.8 శాతం వృద్ధి అంచనాలతో పోలిస్తే ఇది కాస్త ఎక్కువ కావడం గమనార్హం.

ప్రస్తుత ఆర్థిక సంవత్సరంలో తయారీ రంగం 1.6 శాతం మాత్రమే వృద్ధి నమోదు చేయొచ్చని గణాంక కార్యాలయం తెలిపింది. 2021-22 ఆర్థిక సంవత్సరంలో ఈ రంగం 9.9 శాతం వృద్ధి నమోదు చేసింది. అలాగే, మైనింగ్‌ రంగం సైతం గతేడాది 11.5 శాతం వృద్ధి నమోదు చేయగా.. ఈ సారి కేవలం 2.4 శాతం మాత్రమే నమోదు చేసే అవకాశం ఉందని తెలిపింది.

ఇక స్థిర ధరల (2011-12) ప్రకారం రియల్‌ జీడీపీని గణించినప్పుడు ఈ ఏడాది రూ.157.60 లక్షలు కోట్లుగా ఉండనుందని గణాంక కార్యాలయం వెల్లడించింది. 2021-22 ఆర్థిక సంవత్సరం అంచనాల ప్రకారం ఇది రూ.147.36 లక్షల కోట్లుగా ఉంది. అదే ప్రస్తుత ధరల ప్రకారం జీడీపీని లెక్కించినప్పుడు 2022-23 ఆర్థిక సంవత్సరంలో జీడీపీ విలువ రూ.273.08 లక్షల కోట్లుగా ఉండనుంది. గతేడాదికి గానూ ఈ మొత్తం రూ.236.65 కోట్లుగా అంచనా వేసింది.  

రంగాల వారీగా అంచనాలు..

వ్యవసాయ రంగం గతేడాది 3 శాతం వృద్ధి చెందగా.. ఈసారి 3.5 శాతం వృద్ధి నమోదు కావొచ్చని గణాంక కార్యాలయం తెలిపింది. వాణిజ్యం, హోటళ్లు, రవాణా, కమ్యూనికేషన్‌ సేవల రంగం 11.1 శాతం నుంచి 13.7 శాతానికి చేరనుందని అంచనా. ఆర్థిక, స్థిరాస్తి, వృత్తినైపుణ్య సేవలు 4.2 శాతం నుంచి 6.4 శాతానికి పెరగనున్నాయి. నిర్మాణ రంగం 11.5 శాతంతో పోలిస్తే 9.5 శాతానికి తగ్గనుంది. ప్రభుత్వ పాలన, రక్షణ, ఇతర సేవలు 12.6 శాతం నుంచి 7.9 శాతానికి చేరనున్నాయని గణాంక కార్యాలయం తెలిపింది.