Stock Market: నష్టాలతో ప్రారంభమైన స్టాక్ మార్కెట్‌ సూచీలు

ముంబయి: దేశీయ స్టాక్‌ మార్కెట్ సూచీలు ఈ వారాన్ని నష్టాలతో ప్రారంభించాయి. రిజర్వ్‌ బ్యాంక్‌ ఆఫ్‌ ఇండియా(ఆర్‌బీఐ) పరపతి విధాన సమావేశ నిర్ణయాలు, ఈ వారంలో గుజరాత్‌, హిమాచల్‌ ప్రదేశ్‌ ఎన్నికల ఫలితాలు వెలువడనున్న నేపథ్యంలో మదుపర్లు అప్రమత్తత పాటిస్తున్నారు. అటు అంతర్జాతీయ మార్కెట్ల సంకేతాలు కూడా మిశ్రమంగా ఉండటంతో నేటి ట్రేడింగ్‌ను సూచీలు నష్టాలతో ప్రారంభించాయి. ఉదయం 9.30 గంటలకు సెన్సెక్స్‌ 149 పాయింట్ల నష్టంతో 62,719 వద్ద, నిఫ్టీ 34 పాయింట్ల నష్టంతో 18,662 వద్ద ట్రేడ్ అవుతున్నాయి. డాలర్‌తో రూపాయి మారకం విలువ 81.25గా కొనసాగుతోంది. నిఫ్టీలో హిందాల్కో ఇండస్ట్రీస్‌, టాటా స్టీల్‌, జేఎస్‌డబ్ల్యూ స్టీల్‌, ఓఎన్‌జీసీ, యూపీఎల్‌ షేర్లు రాణిస్తుండగా.. హెచ్‌డీఎఫ్‌సీ, హెచ్‌యూఎల్‌, నెస్లే ఇండియా, ఎస్‌బీఐ లైఫ్‌ ఇన్స్యూరెన్స్‌, మహీంద్రా అండ్‌ మహీంద్రా షేర్లు ఒత్తిడికి గురవుతున్నాయి.