Infosys CEO: ఇన్ఫోసిస్‌ సీఈఓగా వరుసగా రెండోసారి సలీల్‌ పరేఖ్‌!

ముంబయి: ఐటీ సేవల దిగ్గజం ఇన్ఫోసిస్‌ సీఈఓ, ఎండీగా తిరిగి సలీల్‌ పరేఖ్‌ను నియమిస్తున్నట్లు ఆదివారం స్టాక్‌ ఎక్స్ఛేంజీలకిచ్చిన సమాచారంలో కంపెనీ తెలిపింది. మరో ఐదేళ్లపాటు ఆయన ఈ పదవిలో కొనసాగనున్నారు. వ్యవస్థాపక సభ్యులు కాకుండా వరుసగా రెండోసారి కంపెనీ సీఈఓగా ఎంపికైన తొలి వ్యక్తిగా సలీల్‌ గుర్తింపు పొందారు. ఆయన నియామకానికి ఇంకా వాటాదారుల ఆమోదం లభించాల్సి ఉంది.

అనేక ప్రాజెక్టులతో వృద్ధిపథంలో దూసుకెళ్తున్న కంపెనీని సమర్థ నాయకత్వంలో కొనసాగించాలనే ఉద్దేశంతోనే సలీల్‌ను తిరిగి నియమించాలని ‘నామినేషన్‌ అండ్‌ రెమ్యూనరేషన్‌ కమిటీ’ నిర్ణయించినట్లు ఇన్ఫోసిస్‌ బోర్డు ఓ ప్రకటనలో తెలిపింది. అలాగే కంపెనీలో ఆరుగురు ఉన్నతాధికారులకు 1,04,000 షేర్లను.. మరో 88 మంది సీనియర్‌ అధికారులకు 3,75,760 షేర్లు కేటాయించాలని ఎన్‌ఆర్‌సీ నిర్ణయించినట్లు తెలిపింది. వీటిని రాబోయే మూడేళ్ల పాటు వారి పనితీరును బట్టి బదిలీ చేయనున్నట్లు పేర్కొంది.