Polifyx: బీమా పాలసీల సమస్యల పరిష్కారానికి పాలిఫిక్స్‌ యాప్‌

ఇంటర్నెట్‌ డెస్క్‌: బీమా సంబంధిత సమస్యలకు పరిష్కారాలను చూపే టెక్‌ సంస్థ ‘ఇన్సూరెన్స్‌ సమాధాన్‌’ కొత్తగా యాప్‌ను ప్రారంభించింది. ‘పాలిఫిక్స్‌ (Polifyx)’ పేరిట తీసుకొచ్చిన ఈ యాప్‌ను బీమా పాలసీల (Insurance Policies)కు సంబంధించిన అన్ని సమస్యలను పరిష్కరించే వేదికగా తీర్చిదిద్దినట్లు కంపెనీ తెలిపింది. పోర్ట్‌ఫోలియో అనాలసిస్‌, నో యువర్‌ పాలసీ, క్లెయిం దరఖాస్తు, ఫిర్యాదు పరిష్కారం, డిజిటల్‌ వాల్ట్‌, బీమా క్లెయిం ఫిర్యాదులు, పోర్ట్‌ఫోలియో సర్వీసుల వంటి ఫీచర్లు ఈ యాప్‌లో ఉన్నట్లు పేర్కొంది.

పొదుపులు, బీమా పాలసీలు (Insurance Policies).. ఆర్థిక లక్ష్యాలకు అనుగుణంగా ఉన్నాయో లేదో కూడా పాలిఫిక్స్‌ ద్వారా తెలుసుకోవచ్చని ఇన్సూరెన్స్‌ సమాధాన్‌ వెల్లడించింది. పాలసీకి సంబంధించిన పత్రాలను అప్‌లోడ్‌ చేసి ఏమైనా తప్పులున్నా కూడా తెలుసుకోవచ్చని పేర్కొంది. కొత్తగా క్లెయింకు దరఖాస్తు కూడా చేసుకోవచ్చని తెలిపింది. అలాగే క్లెయింలో ఏమైనా సమస్యలు తలెత్తినా యాప్‌ ద్వారా ఫిర్యాదు చేయొచ్చని వివరించింది. ఇక డిజిటల్‌ వాల్ట్‌తో కుటుంబ సభ్యుల ఇన్సూరెన్స్‌ పాలసీలన్నింటినీ ఒకే దగ్గర భద్రంగా ఉంచుకోవచ్చని తెలిపింది.

పాలసీ పత్రాలనుఅధ్యయనం చేసి క్లెయిం సమయంలో ఏమైనా సమస్యలు వచ్చే అవకాశం ఉంటే ముందే గుర్తించేలా పాలిఫిక్స్‌ (Polifyx) కృత్రిమ మేధ ఆధారిత పరిష్కారాలను అందిస్తుందని ఇన్సూరెన్స్‌ సమాధాన్‌ తెలిపింది. అలాగే క్లెయిం తిరస్కరణకు గురికాకుండా దరఖాస్తును ఎలా నింపాలో కూడా యాప్‌లోనే సూచనలు, సలహాలు లభిస్తాయని పేర్కొంది.