గత సంవత్సరం ముంబ‌యిలో భారీ వ‌ర్షాలు కుర‌వ‌డంతో జ‌నజీవ‌నం అస్త‌వ్య‌స్త‌మైంది. 2016 లో హైద‌రాబాద్‌లో భారీ వ‌ర్షాలు కొన్ని కాల‌నీల‌ను నీట‌ముంచాయి. అంతకు ముందు సంవ‌త్స‌రం చెన్నై న‌గ‌రం భీక‌ర‌మైన వ‌ర్షానికి అత‌లాకుత‌ల‌మైంది.

సాధార‌ణంగా కారు పార్కింగ్ సౌక‌ర్యం లేనివారు త‌మ వాహ‌నాన్ని బ‌య‌టే ఉంచుతారు. అయితే వ‌రద నీటి ప్ర‌వాహంలో కారు కొట్టుకొని పోతే బీమా వ‌ర్తిస్తుందో లేదో చాలా మందికి సందేహం. ఒక వేళ వ‌ర్తించిన‌ట్ట‌యితే క్లెయిం చేసే విధానాన్ని తెలుసుకుందాం…

వ‌ర‌ద ప్ర‌వాహంలో…

చాలా మంది ఎంతో ఇష్టంతో ఖ‌రీదైన కార్ల‌ను కొంటుంటారు. ముంబ‌యి, హైద‌రాబాద్‌ లాంటి మ‌హాన‌గ‌రాలలో కారు పార్కింగ్ సౌక‌ర్యం లేక ఇంటి బ‌య‌టే కార్ల‌ను ఉంచుతున్నారు. వాటికి భ‌ద్రంగా తాళం కూడా వేస్తున్నారు. అయితే దుర‌దృష్ట‌వ‌శాత్తు కారు వ‌ర‌ద ప్ర‌వాహంలో కొట్టుకుపోతే వెంట‌నే స్థానిక పోలీస్ స్టేష‌న్‌లో ఎఫ్ఐఆర్ న‌మోదు చేయించ‌డం మంచిది.

ఎఫ్‌.ఐ.ఆర్ న‌మోదు

దొంగ‌త‌నానికి గురైన వాహ‌నానికి, జాడ తెలియ‌కుండా పోయిన వాహ‌నాల‌కు స‌మ‌గ్ర మోటారు బీమా పాల‌సీ వ‌ర్తిస్తుంది. ఇలాంటి సంద‌ర్భాలు ఏర్ప‌డిన్ప‌పుడు త‌ప్ప‌కుండా స్థానిక పోలీస్ స్టేష‌న్‌లో ఫిర్యాదు చేయ‌డం ముఖ్యం.

రెండు తాళాలు

ఇలా వ‌ర‌ద ప‌రిస్థితులు ఏర్ప‌డిన‌ప్పుడు కారు ప్ర‌వాహానికి కొట్టుకుపోయిన‌ట్ల‌యితే… కారుకు సంబంధించిన రెండు తాళాల‌ను బీమా కంపెనీకి అందివ్వాల్సి ఉంటుంది. దీనికీ ఓ కార‌ణం ఉంది. మీ నిర్ల‌క్ష్యం వ‌ల్ల కారు దొంగ‌తనానికి గురి కాలేదు అని బీమా కంపెనీకి రుజువు చేసేందుకే రెండు తాళాలు ఇవ్వాల్సిన అవ‌స‌రం ఉంది.

బీమా ప్ర‌క‌టిత విలువ‌

కారు వ‌ర‌ద‌ల్లో కొట్టుకొని పోయి… పోలీస్ స్టేష‌న్‌లో ఫిర్యాదు ఇచ్చాక … దాని జాడ‌ను పోలీసులు క‌నుగొన‌లేక‌పోతే అప్పుడు బీమా సంస్థ‌లు త‌గిన ప‌రిహారం అంద‌జేస్తాయి. ఇలాంటి సంద‌ర్భాల్లో బీమా ప్ర‌క‌టిత విలువ‌ను బ‌ట్టి ప‌రిహారం చెల్లిస్తారు. బీమా ప్ర‌క‌టిత విలువ ప్ర‌తి సంవ‌త్స‌రం మారుతుంటుంది. కాలం గ‌డిచే కొద్దీ వాహ‌న విలువ క్షీణిస్తూ ఉంటుంది. దీనినే డిప్రిషియేష‌న్ అంటారు. బీమా ప్ర‌క‌టిత విలువ లెక్కించేట‌ప్పుడు డిప్రిషియేష‌న్‌ను ప‌రిగ‌ణ‌లోనికి తీసుకుంటారు.

పూర్తి సొమ్ము కావాలంటే

వాహ‌న బీమాతో పాటు ‘‘రిట‌ర్న్ టు ఇన్‌వాయిస్’’ అనే యాడ్ ఆన్ క‌వ‌ర్ గ‌నుక కొన్న‌ట్ల‌యితే … బీమా ప్ర‌క‌టిత విలువ‌తో సంబంధం లేకుండా వాహ‌న కొనుగోలు ధ‌ర‌కు స‌మాన‌మైన ప‌రిహారం ల‌భిస్తుంది. ఈ యాడ్ ఆన్ క‌వ‌ర్ కోసం కాస్త ప్రీమియం ఎక్కువ చెల్లించాల్సి ఉంటుంది.

త‌మ వాహ‌నానికి అద‌న‌పు ర‌క్ష కోరుకునేవారు ‘‘రిట‌ర్న్ టు ఇన్‌వాయిస్’’ అనే యాడ్ ఆన్ క‌వ‌ర్ కొంటే మంచిది.