Jeff Bezos: ప్రియురాలు లారెన్‌ శాంచెజ్‌తో జెఫ్‌ బెజోస్‌ నిశ్చితార్థం!

వాషింగ్టన్‌: అమెజాన్‌ వ్యవస్థాపకుడు జెఫ్‌ బెజోస్‌ (Jeff Bezos ) ఆయన ప్రియురాలు లారెన్‌ శాంచెజ్‌ (Lauren Sanchez)తో నిశ్చితార్థం చేసుకున్నట్లు సమాచారం. ఈ మేరకు విశ్వసనీయ వర్గాలను ఉటంకిస్తూ పలు అంతర్జాతీయ మీడియా సంస్థలు కథనాలను ప్రచురించాయి. వీరివురు త్వరలోనే పెళ్లి చేసుకోనున్నారంటూ గత కొంతకాలంగా వార్తలు చక్కర్లు కొడుతున్న విషయం తెలిసిందే. లారెన్‌ (Lauren Sanchez) ఇటీవల హృదయాకారంలో ఉన్న చేతి ఉంగరాన్ని ధరించడం ప్రారంభించినప్పటి నుంచి ఊహాగానాలు మరింత ఊపందుకున్నాయి.

లారెన్ (Lauren Sanchez) గతంలో జర్నలిస్టుగా పనిచేశారు. ప్రస్తుతం ఆమె దాతృత్వ కార్యక్రమాల్లో చురుగ్గా పాల్గొంటున్నారు. బెజోస్‌ (Jeff Bezos), లారెన్‌ 2018 నుంచే డేటింగ్‌లో ఉన్నట్లు సమాచారం. అయితే, 2019 వరకు ఆ విషయం బయటకు రాలేదు. బెజోస్‌ తన భార్య మెకంజీ స్కాట్‌తో ఉన్న 25 ఏళ్ల బంధానికి స్వస్తి పలుకుతూ విడాకులు తీసుకున్న విషయం తెలిసిందే. వీరివురికి నలుగురు పిల్లలు ఉన్నారు. ఈ విడాకుల ప్రక్రియ పూర్తయ్యే వరకు లారెన్‌ (Lauren Sanchez), బెజోస్‌.. తమ మధ్య బంధాన్ని బయటకు అధికారికంగా వెల్లడించలేదు.

బెజోస్‌ (Jeff Bezos) నుంచి మెకంజీ 38 బిలియన్‌ డాలర్లు భరణంగా పొందారు. దీంట్లో సగం దాతృత్వ కార్యక్రమాల కోసం వితరణ చేశారు. మరోవైపు లారెన్‌ (Lauren Sanchez)కు గతంలో పాట్రిక్‌ వైట్‌సెల్‌ అనే వ్యక్తితో వివాహమైంది. వీరివురికి ఇద్దరు పిల్లలున్నారు. మాజీ ఎన్‌ఎఫ్‌ఎల్‌ ఆటగాడు టోనీ గోంజలెజ్‌తోనూ ఆమె ఓ కుమారుడికి జన్మనిచ్చింది.