Jio 5G: ఒకే రోజు 11 నగరాల్లో జియో 5జీ సేవలు ప్రారంభం

దిల్లీ: ప్రముఖ టెలికాం సంస్థ రిలయన్స్‌ జియో (Jio) తన 5జీ సేవల్ని వేగంగా విస్తరిస్తోంది. తాజాగా దేశవ్యాప్తంగా ఉన్న 11 నగరాల్లో ఒకే రోజు 5జీ సేవలను (5G services) ప్రారంభించింది. ఇందులో తిరువనంతపురం, లఖ్‌నవూ, మైసూరు వంటి ప్రధాన నగరాలతో పాటు నాసిక్‌, ఔరంగాబాద్‌, చండీగఢ్‌, మొహాలీ, పంచకుల, జిరాకక్‌పూర్‌, ఖరార్‌, డేరాబస్సీ నగరాలు ఉన్నాయి. 

ఆయా నగరాల్లో 5జీ సేవలను ప్రారంభించిన తొలి సంస్థ తమదేని జియో ఓ ప్రకటనలో తెలిపింది. వేర్వేరు రాష్ట్రాలకు చెందిన నగరాల్లో ఒకేరోజు ఇంత పెద్ద ఎత్తున 5జీ సేవలు ప్రారంభించడం ఇదే తొలిసారని పేర్కొంది. ఈ నగరాలు ప్రముఖ పర్యాటక కేంద్రాలే కాకుండా ఎడ్యుకేషన్‌ హబ్‌లుగా ఉన్నాయని కంపెనీ ప్రతినిధి పేర్కొన్నారు. జియో వెల్‌కమ్‌ ఆఫర్‌ కింద 1Gbps వేగంతో ఉచితంగా అపరిమిత డేటా ఆయా నగరవాసులు వినియోగించుకోవచ్చని తెలిపారు.