Google Layoffs: దారుణ పరిస్థితులను నివారించడానికే ఆ నిర్ణయం: పిచాయ్‌

వాషింగ్టన్‌: కంపెనీ వృద్ధి నెమ్మదించిన నేపథ్యంలోనే ఉద్యోగుల తొలగింపు (Layoffs) విషయంలో కఠినంగా వ్యవహరించాల్సి వచ్చిందని గూగుల్‌ (Google) సీఈఓ సుందర్‌ పిచాయ్‌ (Sundar Pichai) అన్నారు. ఈ విషయంలో ‘‘స్పష్టమైన, కచ్చితమైన, ముందస్తుగా నిర్ణయం తీసుకోకపోయి ఉంటే సమస్య మరింత పెద్దదై పరిస్థితి చాలా దారుణంగా మారి ఉండేది’’ అని ఆయన అన్నట్లు బ్లూమ్‌బెర్గ్ పేర్కొంది. ఉద్యోగులతో సోమవారం నిర్వహించిన అంతర్గత సమావేశంలో ఆయన ఈ వ్యాఖ్యలు చేసినట్లు వెల్లడించింది.

కేవలం ఉద్యోగుల తొలగింపుల (Layoffs)తో ఈ ప్రక్రియ ఆగిపోదని కూడా పిచాయ్‌ (Sundar Pichai) తాజా సమావేశంలో స్పష్టం చేసినట్లు సమాచారం. బోనస్‌లు కంపెనీ వృద్ధికి అనుసంధానించిన విషయాన్ని ఆయన (Sundar Pichai) గుర్తుచేశారు. ఈ నేపథ్యంలో బాధ్యతాయుత నాయకత్వ హోదాల్లో ఉన్న అందరికీ ఈ ఏడాది బోనస్‌లు తగ్గుతాయని ఆయన స్పష్టం చేసినట్లు తెలుస్తోంది. మరోవైపు సుదీర్ఘకాలం కంపెనీలో పనిచేసి తాజాగా ఉద్యోగం కోల్పోయిన వారికి పరిహార ప్యాకేజీని సిద్ధం చేస్తున్నట్లు మరో ఉన్నతోద్యోగి పేర్కొన్నారు.

ప్రాధాన్య అంశాల్లో పెట్టుబడులను కొనసాగించి.. కంపెనీ భవిష్యత్‌ను పరిరక్షించడంలో భాగంగానే ఈ నిర్ణయం తీసుకున్నామని గూగుల్‌ (Google) మాతృసంస్థ ఆల్ఫాబెట్‌ ఫైనాన్షియల్‌ ఆఫీసర్‌ రుత్‌ పోరట్‌ అన్నారు. ఈ విషయంలో వీలైనంత త్వరగా, స్పష్టంగా వ్యవహరిస్తేనే దీర్ఘకాల పెట్టుబడులు పెట్టే సామర్థ్యం ఏర్పడుతుందని తాము భావించినట్లు అభిప్రాయపడ్డారు.

అంతర్జాతీయంగా 12,000 మంది ఉద్యోగులను తొలగించనున్నట్లు గత శుక్రవారం గూగుల్‌ (Google) వెల్లడించింది. కొవిడ్‌-19 పరిణామాల సమయంలో, అప్పటి అవసరాలకు తగ్గట్లుగా అధిక నియామకాలు చేపట్టామని.. ప్రస్తుత పరిస్థితులకు అనుగుణంగా ఈ నిర్ణయం తీసుకున్నట్లు కంపెనీ చెప్పింది. ‘కఠిన సమీక్ష అనంతరమే ఉద్యోగుల తొలగింపు (Layoffs)ను ప్రకటిస్తున్నాం. ఆల్ఫాబెట్‌, ఉత్పత్తులు విభాగాలు, కార్యకలాపాలు, స్థాయిలు, ప్రాంతాల వ్యాప్తంగా ఈ ఉద్యోగాల కోత ఉంటుంది. అసాధారణ నైపుణ్యమున్న ఉద్యోగులకూ వీడ్కోలు చెప్పాల్సి వస్తోంది. దీనిపై నేను క్షమాపణలు చెబుతున్నాను. ఈ నిర్ణయం వారి జీవితాలపై కచ్చితంగా ప్రభావం చూపుతుందనే విషయం నాకు ఆందోళన కలిగిస్తోంద’ని సుందర్‌ పిచాయ్‌ ఉద్యోగులకు పంపిన ఇమెయిల్‌లో పేర్కొన్నారు.