LIC on whatsapp: వాట్సాప్‌లో ఎల్‌ఐసీ సేవలు.. ఎలా పొందాలి?

ఈనాడు, హైదరాబాద్‌: జీవిత బీమా రంగ దిగ్గజం భారతీయ జీవిత బీమా సంస్థ (LIC) పాలసీదారులకు మరింత సులభంగా సేవలను అందించనుంది. దీనికోసం వాట్సాప్‌లో కొత్త నంబరును ప్రారంభించింది. ‘పాలసీదారులు 8976862090 నంబరుకు ‘హాయ్‌’ (Hi) అని సందేశం పంపిస్తే చాలు. మొత్తం 10 రకాల సేవలను అందుబాటులోకి వస్తాయ’ని ఎల్‌ఐసీ ఛైర్మన్‌ ఎం.ఆర్‌.కుమార్‌ తెలిపారు.

వాట్సాప్‌ ద్వారా ప్రీమియం బకాయి, బోనస్‌ సమాచారం, పాలసీ స్థితి, పాలసీపై రుణం ఎంత వస్తుంది?, రుణం తిరిగి చెల్లింపు, రుణంపై వడ్డీ, ప్రీమియం చెల్లింపు సర్టిఫికెట్‌, యులిప్‌- యూనిట్ల స్టేట్‌మెంట్‌, ఎల్‌ఐసీ సేవలకు సంబంధించిన లింకులు, ఆప్ట్‌ ఇన్‌/ఆప్ట్‌ ఔట్‌ సేవలను పొందేందుకు వీలుందని పేర్కొన్నారు. ముందుగా పాలసీ వివరాలను ఎల్‌ఐసీ పోర్టల్‌లో నమోదు చేసుకొన్న వారు, తమ అధీకృత మొబైల్‌ నంబరు నుంచి ఈ సేవలను పొందవచ్చు.