LPG cylinder: తగ్గిన వాణిజ్య గ్యాస్‌ సిలిండర్‌ ధర

దిల్లీ: వాణిజ్య సిలిండర్ల వినియోగదారులకు ఉపశమనం కలిగింది. 19 కేజీల ఎల్పీజీ సిలిండర్‌ ధరను చమురు సంస్థలు తగ్గించాయి. ఒక్కో సిలిండర్‌పై ₹115.50 మేర తగ్గిస్తున్నట్లు ప్రకటించాయి. దీంతో దేశ రాజధాని దిల్లీలో కమర్షియల్‌ గ్యాస్‌ సిలిండర్‌ ధర ₹1,744కి, ముంబయిలో ₹1,696కు చేరాయి. తగ్గించిన ధరలు నేటి నుంచే అమల్లోకి వస్తాయని చమురు సంస్థలు వెల్లడించాయి. అయితే 14.2 కేజీల గృహ వినియోగ సిలిండర్‌ ధరలో మాత్రం ఎలాంటి మార్పూ లేదు. జులై నుంచి 14.2 కేజీల గ్యాస్ సిలిండర్ రేటు నిలకడగానే ఉంది. కమర్షియల్ గ్యాస్ సిలిండర్ ధర మాత్రం తగ్గుతూ వస్తోంది.

ఏటీఎఫ్‌ ధర పెంపు

వాణిజ్య సిలిండర్‌ వినియోగదారులకు ఊరట కల్పించిన చమురు కంపెనీలు.. విమానాల్లో వాడే ఇంధనం (ATF) ధరను మాత్రం పెంచింది. కిలోలీటర్‌ జెట్‌ ఫ్యూయల్‌ను 4.2 శాతం మేర పెంచాయి. దీంతో దిల్లీలో కిలోలీటర్‌ ఏటీఎఫ్‌ ధర ₹ 4,842.37 పెరిగి.. ₹ 120,362.64కు చేరింది. గత నెల ఏటీఎఫ్‌ ధరలు తగ్గగా.. ఈ నెల పెరగడం గమనార్హం.