Maruti Suzuki: పెరిగిన మారుతీ కార్ల ధరలు.. నేటి నుంచే అమల్లోకి!

ఇంటర్నెట్‌ డెస్క్‌: దేశీయ కార్ల తయారీ దిగ్గజం మారుతీ సుజుకీ కార్ల ధరలను పెంచింది. కొత్త ధరలు నేటి నుంచే అమల్లోకి రానున్నట్లు ఓ ప్రకటనలో పేర్కొంది. నిర్వహణ, ముడి సరకుల వ్యయాలు పెరిగిన నేపథ్యంలోనే ధరల్ని పెంచినట్లు తెలిపింది. గత ఏడాది కాలంగా పెరుగుతున్న ముడి సరకుల వ్యయాల వల్ల తమ వాహనాల తయారీపై తీవ్ర ప్రభావం పడుతోందని పేర్కొంది. ఫలితంగా కొంత భారాన్ని వినియోగదారుపై మోపక తప్పడం లేదని వివరించింది. మోడల్‌ను బట్టి ధరలు గరిష్ఠంగా 1.3 శాతం వరకు పెరిగినట్లు తెలిపింది. జనవరి 2021 నుంచి మార్చి 2022 మధ్య పలు దఫాల్లో మారుతీ సుజుకీ కార్ల ధరలు పెరిగాయి. ఈ మధ్య కాలంలో ధరలు 8.8 శాతం మేర పెరిగాయి. గత జనవరిలో ఈ కంపెనీ కార్ల ధరల్ని 1.7 శాతం వరకు పెంచింది. మారుతీతో పాటు బీఎండబ్ల్యూ, టాటా మోటార్స్‌, టయోటా, మహీంద్రా అండ్‌ మహీంద్రా, హీరో మోటోకార్ప్‌ సైతం ఇటీవల ధరల్ని పెంచిన వాటిలో ఉన్నాయి.