Maruti Suzuki: మారుతీ @ 2.5 కోట్లు.. నాలుగేళ్లలో 50 లక్షల వాహనాల ఉత్పత్తి

దిల్లీ: దేశీయ ఆటోమొబైల్‌ దిగ్గజం మారుతీ సుజుకీ ఇండియా (Maruti Suzuki India) అరుదైన మైలురాయిని చేరుకుంది. ఇప్పటి వరకు 2.5 కోట్ల వాహనాలను ఉత్పత్తి చేసిన సంస్థగా నిలిచింది. 1983 డిసెంబర్‌లో దేశీయంగా ఉత్పత్తిని ప్రారంభించిన మారుతీ.. 1994 మార్చి నాటికి 10 లక్షల వాహనాలను ఉత్పత్తి చేసిన కంపెనీగా ఎదిగింది. కోటి వాహనాల మైలురాయిని 2011లో పూర్తి చేసింది. 2018 జులై నాటికి 2 కోట్ల వాహనాలను ఉత్పత్తి చేసిన ఆ కంపెనీ.. నాలుగేళ్లలోనే మిగిలిన 50 లక్షల వాహనాలను ఉత్పత్తి చేసింది.

హరియాణాలోని గురుగ్రామ్‌లో తొలి కర్మాగారాన్ని ప్రారంభించిన మారుతీ.. మనేసర్‌లో మరో కర్మాగారాన్ని తర్వాత ప్రారంభించింది. రెండు ప్లాంట్ల ద్వారా ఏడాదికి 15 లక్షల యూనిట్లను ప్రస్తుతం ఉత్పత్తి చేస్తోంది. భారత్‌ సహా 100 దేశాలకు తమ వాహనాలను ఎగుమతి చేస్తోంది. 40వ వార్షికోత్సవాన్ని పూర్తి చేసుకున్న ఏడాదే ఈ మైలురాయిని అందుకోవడం ఆనందంగా ఉందని కంపెనీ మేనేజింగ్‌ డైరెక్టర్‌, సీఈఓ హిసాషి సంతోషం వ్యక్తంచేశారు. ఎప్పటికప్పుడు కొత్త ఉత్పత్తులను మార్కెట్‌లోకి తీసుకొస్తామని పేర్కొన్నారు. మున్ముందూ ప్రయాణికుల వాహనాలకు వినియోగదారుల నుంచి ఇదే స్థాయిలో డిమాండ్‌ కొనసాగుతుందని ఆశిస్తున్నట్లు పేర్కొన్నారు.