Anant Ambani Wedding: అనంత్‌ అంబానీ-రాధిక ప్రీవెడ్డింగ్‌ వేడుకల్లో సామూహిక వివాహాలు

Anant Ambani-Radhika Merchant wedding: అనంత్‌ అంబానీ-రాధిక మర్చెంట్‌ ప్రీ వెడ్డింగ్‌ వేడుకల్లో భాగంగా పలు జంటలకు సామూహిక వివాహాలు జరిపించనున్నారు. జులై 2న ఈ కార్యక్రమం జరగనుంది.

Updated : 29 Jun 2024 16:55 IST

Anant Ambani-Radhika Merchant wedding | ముంబయి: రిలయన్స్‌ ఇండస్ట్రీస్‌ అధినేత ముకేశ్ అంబానీ చిన్న కుమారుడు అనంత్‌ అంబానీ (Anant Ambani)-రాధికా మర్చెంట్‌ పెళ్లి ముచ్చట అందరి దృష్టిని ఆకర్షిస్తోంది. ఇప్పటికే వీరి నిశ్చితార్థం, ప్రీవెడ్డింగ్‌ వేడుక అంగరంగా వైభవంగా జరిగిన సంగతి తెలిసిందే. ఇప్పుడు మరోసారి ముందస్తు పెళ్లి వేడుకల (Pre Wedding)కు అంబానీ కుటుంబం సిద్ధమైంది. ఇందులో భాగంగా పలు జంటలకు సామూహిక వివాహాలు (Mass wedding) జరిపించనున్నారు.

పాల్ఘర్‌లోని స్వామి వివేకానంద విద్యామందిర్‌లో జులై 2న సాయంత్రం ఈ కార్యక్రమం జరగనుంది. పేద కుటుంబాలకు చెందిన పలు జంటలకు ఇందులో సామూహిక పెళ్లిళ్లు జరిపించనున్నారు. ఈ వేడుకలకు ముకేశ్‌ అంబానీ (Mukesh Ambani) కుటుంబ సభ్యులు కూడా హాజరుకానున్నారు. ఇటీవల గుజరాత్‌లో జరిగిన ప్రీవెడ్డింగ్‌ వేడుకల సమయంలోనూ అంబానీ కుటుంబం సమీప గ్రామ ప్రజలకు అన్న సేవను నిర్వహించిన సంగతి తెలిసిందే.

పారిశ్రామికవేత్త వీరెన్‌ మర్చెంట్‌ కుమార్తె రాధికతో అనంత్‌ అంబానీ వివాహం జులై 12న జరగనుంది. ముంబయిలోని బాంద్రా కుర్లా కాంప్లెక్స్‌లో గల జియో వరల్డ్‌ కన్వెన్షన్‌ సెంటర్‌ ఇందుకు వేదిక కానుంది. మూడు రోజుల పాటు పెళ్లి వేడుకలు జరగనున్నాయి. జులై 12న ముఖ్య ఘట్టమైన ‘శుభ్‌ వివాహ్‌’తో మొదలయ్యే ఈ సెలబ్రేషన్స్‌.. జులై 13న ‘శుభ్‌ ఆశీర్వాద్‌’, జులై 14న ‘మంగళ్‌ ఉత్సవ్‌’తో ముగుస్తాయి.

అంబానీ వారి పెళ్లి శుభలేఖ.. అదుర్స్!

ఇప్పటికే ఆహ్వాన పత్రికకు సంబంధించిన వీడియో నెట్టింట వైరల్‌గా మారింది. తొలి పత్రికను నీతా అంబానీ (Nita Ambani) వారణాసిలోని కాశీ విశ్వనాథుని పాదాల వద్ద ఉంచి ఆశీస్సులు తీసుకున్నారు. అటు మహారాష్ట్ర సీఎం ఏక్‌నాథ్‌ శిందే సహా పలువురు రాజకీయ, సినీ ప్రముఖులను అంబానీ కుటుంబం స్వయంగా వెళ్లి ఆహ్వానిస్తోంది.

ఇక, గుజరాత్‌లోని జామ్‌నగర్‌ వేదికగా ఈ ఏడాది మార్చి 1-3 వరకు అనంత్‌-రాధిక ప్రీవెడ్డింగ్‌ వేడుకలు ఘనంగా జరిగాయి. దేశ, విదేశాల్లో పలు రంగాలకు చెందిన ప్రముఖులు హాజరయ్యారు. వారికి అంబానీ కుటుంబం గ్రాండ్‌గా ఆతిథ్యమిచ్చింది.


Tags :

Trending

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని