XUV 300: ఎక్స్‌యూవీ 300 విద్యుత్తు మోడల్‌పై మహీంద్రా కీలక ప్రకటన

ముంబయి: ప్రముఖ దేశీయ వాహన తయారీ సంస్థ మహీంద్రా అండ్‌ మహీంద్రా ఎక్స్‌యూవీ 300 ఎస్‌యూవీ విద్యుత్తు వాహనానికి సంబంధించి కీలక ప్రకటన చేసింది. ఈ మోడల్‌ పూర్తిస్థాయి విద్యుత్తు వాహనాన్ని వచ్చే ఏడాది తొలి త్రైమాసికంలో విడుదల చేస్తామని సోమవారం వెల్లడించింది. అలాగే ఈ ఆగస్టులో తమ ‘విద్యుత్తు వాహన ప్రణాళిక’ను ఆవిష్కరించనున్నట్లు తెలిపింది.

మహీంద్రా ఇటీవలే ఫోక్స్‌వ్యాగన్‌ గ్రూపుతో చేతులు కలిపింది. విద్యుత్తు వాహన తయారీలో మహీంద్రాకు ఫోక్స్‌వ్యాగన్‌ సహకారం అందించనుంది. తాము ఇటీవల విడుదల చేసిన ఎక్స్‌యూవీ 700 కోసం 18-24 నెలలు వేచిచూడాల్సి వస్తోందని కంపెనీ తెలిపింది. అయినప్పటికీ బుకింగ్‌లలో 10-12 శాతం కంటే ఎక్కువ మంది రద్దు చేసుకోలేదని పేర్కొంది. ప్రతినెలా 5000 యూనిట్లను తయారు చేస్తున్నామని తెలిపింది. కానీ, బుకింగ్‌లు మాత్రం 9,000-10,000 వరకు ఉంటున్నాయని పేర్కొంది. సెమీకండక్టర్ల లభ్యత పెరిగిన కొద్దీ తయారీ యూనిట్లు కూడా పెరుగుతాయని వెల్లడించింది.