ముత్తూట్‌ మినీ సీఓఓగా శ్రీజిల్‌ ముకుంద్‌

దిల్లీ: ప్రముఖ బ్యాంకింగేతర ఆర్థిక సేవల సంస్థ (NBFC) ముత్తూట్‌ మినీ ఫైనాన్షియర్స్‌ సంస్థ శ్రీజిల్‌ ముకుంద్‌ను కొత్త చీఫ్‌ ఆపరేటింగ్‌ ఆఫీసర్‌గా నియమించింది. సంస్థ దీర్ఘకాలిక లక్ష్యాలను చేరుకోవడానికి ఆయన విస్తృత బ్యాంకింగ్‌ అనుభవాన్ని వినియోగించుకోనున్నట్లు ఆ సంస్థ ఓ ప్రకటనలో తెలిపింది. శ్రీజిల్‌ ముకుంద్‌ బిజినెస్‌ మేనేజ్‌మెంట్‌లో గ్రాడ్యుయేషన్‌ పూర్తిచేశారు. సర్టిఫైడ్‌ అసోసియేటెడ్‌ ఆఫ్‌ ఇండియన్‌ ఇన్‌స్టిట్యూట్‌ ఆఫ్‌ బ్యాంకర్స్‌ (CAIIB) వృత్తిపరమైన కోర్సుతో పాటు సౌత్‌ ఇండియన్‌ బ్యాంక్‌లో 25 ఏళ్ల పాటు పనిచేసిన అనుభవం ఉంది. ఆ బ్యాంకుకు రెండు రీజియన్లకు హెడ్‌గా పనిచేయడంతో పాటు బ్యాంక్‌ ఎన్‌ఆర్‌ఐ వ్యాపారానికి నేషనల్‌ హెడ్‌గానూ వ్యవహరించారు. నాలుగేళ్ల పాటు డిప్యుటేషన్‌పై దుబాయ్‌లో ఎక్స్ఛేంజ్ కంపెనీకి నాయకత్వం వహించారు. 2018లో దుబాయ్‌లో ఆ బ్యాంక్ మొదటి విదేశీ కార్యాలయాన్ని ప్రారంభించడంలో కూడా శ్రీజిల్‌ కీలక పాత్ర పోషించారు. మధ్యప్రాచ్యం మార్కెట్‌తో పాటు ఎన్‌ఆర్‌ఐల సారథ్యంలోని వ్యాపార రంగంలో శ్రీజిల్‌కు ఉన్న విశేష అనుభవాన్ని సంస్థ వృద్ధికి దోహదపడుతుందని ఆశిస్తున్నట్లు ముత్తూట్‌ మినీ పేర్కొంది.