Tobacco Rules: పొగాకు హెచ్చరిక నిబంధనలపై OTTల అభ్యంతరం..!

దిల్లీ: థియేటర్ల తరహాలోనే ఓటీటీల్లోనూ (OTT) ఇకపై పొగాకు వ్యతిరేక హెచ్చరికలను (Tobacco rules) తప్పనిసరి చేయడంపై ఓటీటీ వేదికల నుంచి వ్యతిరేకత వ్యక్తమవుతోంది. సినిమాలు, వెబ్‌ సిరీస్‌లు, ఇతర వినోద కార్యక్రమాల్లోనూ ఈ నిబంధనను పాటించాలని కేంద్రం సూచించడంపై ఆయా వేదికలు అభ్యంతరం వ్యక్తంచేస్తున్నాయి. ప్రపంచ పొగాకు వ్యతిరేక దినం సందర్భంగా తీసుకొచ్చిన నిబంధనను సవాల్‌ చేయాలని ఓటీటీ వేదికలు నిర్ణయించినట్లు తెలుస్తోంది.

‘పొగాకు వినియోగం క్యాన్సర్‌ కారకం, పొగాకు వినియోగం ప్రాణాంతకం’ అని సినిమా థియేటర్లు, టీవీల్లో ప్రదర్శించినట్లుగానే ఓటీటీల్లోనూ కార్యక్రమం ప్రారంభానికి ముందు, మధ్యలో కనీసం 30 సెకన్ల పాటు పొగాకు దుష్ప్రభావాన్ని వివరించేలా ప్రకటన ఉండాలని కేంద్రం ఇటీవల ఓటీటీలకు సూచించింది. దీంతో పాటు పొగాకు ఉత్పత్తులను, వాటి వినియోగాన్ని చూపే దృశ్యాలు వచ్చినప్పుడు డిస్‌క్లెయిమర్‌ను చూపించాలని పేర్కొంది. ఈ హెచ్చరికలు కూడా ఓటీటీ కంటెంట్‌ ప్రసారమయ్యే భాషలోనే ఉండాలని  ఆరోగ్య మంత్రిత్వ శాఖ స్పష్టం చేసింది.

ఈ నిబంధన పట్ల ఓటీటీ కంపెనీలు అభ్యంతరం వ్యక్తంచేస్తున్నాయి. హెచ్చరికలను జోడించడం కోసం ఇప్పటికే ఉన్న లక్షలాది గంటల కంటెంట్‌ను ఎడిట్‌ చేయడమనేది తలకుమించిన భారంగా భావిస్తున్నాయి. ఈ మేరకు అమెజాన్‌, డిస్నీ, నెట్‌ఫ్లిక్స్‌తో పాటు జియో సినిమాకు చెందిన ప్రతినిధులు ఇటీవల సమావేశమైనట్లు తెలుస్తోంది. దీనిపై న్యాయపరంగా ఎలా ముందుకెళ్లాలన్నదానిపై ఈ సమావేశంలో చర్చించారని సంబంధిత వర్గాలు పేర్కొన్నాయి. ముఖ్యంగా ఐటీ, సమాచార, ప్రసారాల శాఖ కాకుండా ఆరోగ్యమంత్రిత్వ శాఖ నోటిఫికేషన్‌ జారీ చేసిన నేపథ్యంలో ఆ శాఖ అధికారాలను సవాల్‌ చేయాలని నిర్ణయానికి వచ్చినట్లు తెలిసింది.