బ్యాంకుల్లో ఎన్‌పీఏలు పెరుగుతాయ్‌

ముంబయి: బ్యాంకుల ఆస్తుల నాణ్యత గత ఏడాది రెండో అర్ధ భాగంలో మెరుగైనప్పటికీ, ఈ ఏడాది తొలి అర్ధ భాగంలో డీలా పడే అవకాశం ఉందని ఫిక్కీ-ఐబీఏ సర్వే వెల్లడించింది. 2021 తొలి 6 నెలల కాలంలో బ్యాంకుల నిరర్థక ఆస్తులు (ఎన్‌పీఏలు) పెరుగుతాయనే అంచనాను వ్యక్తం చేసింది.  2020 జులై-డిసెంబరు మధ్య కాలంలో ఫిక్కీ-ఐబీఏ కలిసి 20 బ్యాంకులపై ఈ సర్వే చేశాయి.  ప్రభుత్వ రంగంతో పాటు ప్రైవేటు రంగ, విదేశీ బ్యాంకుల్ని సైతం పరిగణనలోకి తీసుకున్నాయి. ఆస్తుల పరిమాణం పరంగా ఈ బ్యాంకులు మొత్తం పరిశ్రమలో 59 శాతం వాటా కలిగి ఉన్నాయి.  సగం బ్యాంకులు 2020 రెండో అర్ధ భాగంలో ఎన్‌పీఏలు తగ్గాయని పేర్కొన్నాయి. 78 శాతం ప్రభుత్వ రంగ బ్యాంకులూ ఇదే సమాచారం ఇచ్చాయి.
* 2021 తొలి 6 నెలల కాలంలో ఎన్‌పీఏలు 10 శాతానికి పైగా నమోదు కావొచ్చని 68 శాతం బ్యాంకర్లు పేర్కొన్నారు. ఎన్‌పీఏలు 12 శాతానికి చేరొచ్చని 37% బ్యాంకర్లు వెల్లడించారు. 
* ఎన్‌పీఏలు అధికంగా నమోదయ్యే రంగాల్లో పర్యాటకం, ఆతిథ్యం, ఎమ్‌ఎస్‌ఎమ్‌ఈ, విమానయానం, రెస్టారెంట్లు ఉన్నాయి. పర్యాటక, ఆతిథ్య రంగాల్లో ఎన్‌పీఏలు ఎక్కువగా పెరుగుతాయని 55 శాతం మంది బ్యాంకర్లు అంచనా వేయగా, ఓ మోస్తరుగా పెరగొచ్చని 45 శాతం మంది పేర్కొన్నారు.
* ఎమ్‌ఎస్‌ఎమ్‌ఈ రంగంలో ఎన్‌పీఏలు పెరుగుతాయని 84% మంది బ్యాంకర్లు వెల్లడించారు. 
* రెస్టారెంట్ల రంగంలో ఎన్‌పీఏలు పెరుగుతాయని 89 శాతం మంది తెలిపారు. 26 శాతం మంది ఈ రంగంలో గణనీయంగా ఎన్‌పీఏలు పెరుగుతాయని వివరించారు.
* మౌలికం, ఫార్మా, ఫుడ్‌ ప్రాసెసింగ్‌ రంగాల్లో దీర్ఘకాలానికి రుణగిరాకీ బాగా పెరుగుతోందని సర్వే తెలిపింది.
* ఔషధ రంగంలో దీర్ఘ కాలిక రుణాల కోసం ఎక్కువ ఆసక్తి కనిపించిందని 45 శాతం మంది బ్యాంకర్లు పేర్కొన్నారు. 

ఇవీ చదవండి..
అమెరికా చమురే ఎందుకు..

విక్రయానికి 13 విమానాశ్రయాలు!