ఎన్‌పీఎస్ ఖాతా తెర‌వాల‌నుకుంటున్నారా? ఆన్‌లైన్‌లోనే తెర‌వ‌చ్చు.

ప‌ద‌వీ విర‌మ‌ణ త‌ర్వాత ఆర్థిక భ‌ద్ర‌త చేకూర్చ‌డంలో జాతీయ పింఛ‌ను ప‌థ‌కం తోడ్ప‌డుతుంది. 18 నుంచి 70 సంవ‌త్స‌రాల‌ మ‌ధ్య వ‌య‌సు ఉన్న వ్య‌క్తులు ఈ ప‌థ‌కంలో చేర‌వ‌చ్చు. ఎన్‌పీఎస్‌లో కొత్తగా ఖాతా తెర‌వాల‌నుకుంటున్నవారు ఆధార్ ఆధారిత ఆన్‌లైన్ కేవైసి ప్రక్రియను పూర్తి చేసి ఈ-ఎన్‌పీఎస్ ద్వారా ఖాతా తెర‌వ‌చ్చు. ఈ-ఎన్‌పీఎస్ అనేది ఆన్‌లైన్ రికార్డ్ కీపింగ్ ఏజెన్సీలు (సీఆర్ఏ) నిర్వ‌హించే ఆన్‌లైన్ ఎన్‌పీఎస్ ఆన్‌బోర్డింగ్ పోర్టల్. దీని ద్వారా ఎన్‌పీఎస్ ఖాతాను ఆన్‌లైన్‌లో ప్రారంభించ‌డంతో పాటు,  డిపాజిట్ కూడా చేయ‌వ‌చ్చు. అలాగే ప్రస్తుతం ఉన్న చందాదారులు వారి టైర్ -2 ఖాతాను కూడా యాక్టివేట్ చేసుకోవ‌చ్చు. ప్రస్తుతం, ఈ-ఎన్‌పీఎస్ కింద నమోదు 'ఆధార్ ఆఫ్‌లైన్ ఈ-కేవైసి' ద్వారా లేదా 'పాన్, బ్యాంక్ ఖాతా' ద్వారా జరుగుతుంది. 

ఆధార్ ద్వారా రిజిస్ట్రేషన్ :
దీనికి యూఐడీఏఐ అందించిన ఆధార్ సంఖ్య లేదా 16-అంకెల వర్చువల్ ఐడెంటిఫికేషన్ (వీఐడీ) సంఖ్య, ఆధార్ న‌మోదిత మొబైల్ నంబర్ అవ‌స‌రం. 
ఈ-ఎన్‌పీఎస్‌లో ఆధార్ ఆధారిత కేవైసి నమోదు ప్రక్రియ:
* ఆధార్ ఉపయోగించి ఆన్‌లైన్‌లో ఎన్‌పీఎస్ ఖాతా తెరవడానికి, చందాదారులు ఇ-ఎన్‌పీఎస్ పోర్టల్ ఓపెన్ చేయాలి
*  అక్క‌డ “నేషనల్ పెన్షన్ సిస్టమ్” పై క్లిక్ చేసి, ఆపై “రిజిస్ట్రేషన్” ఆప్ష‌న్‌పై క్లిక్ చేయాలి.
* చందాదారులు ఇప్పుడు ఖాతా ప్రారంభించే కేట‌గిరీని ఎంచుకోవాలి - “వ్యక్తిగత చందాదారుడు” లేదా “కార్పొరేట్ చందాదారుడు”. ఇంకా, దరఖాస్తుదారుడి స్టేట‌స్‌ “సిటిజన్ ఆఫ్ ఇండియా” లేదా “నాన్-రెసిడెంట్ ఆఫ్ ఇండియా (ఎన్‌ఆర్‌ఐ)” లేదా “ఓవర్సీస్ సిటిజన్ ఆఫ్ ఇండియా (ఓసిఐ)” నుంచి ఎన్నుకోవాలి.
* చందాదారులు రిజిస్ట్రేషన్ సమయంలో “ఆధార్ ఆన్‌లైన్ / ఆఫ్‌లైన్ కేవైసి” ఎంచుకోవాలి, ఖాతా తెరవడానికి ‘టైర్ రకాలను’ ఎంచుకోవాలి.
* ఇప్పుడు ఆధార్ లేదా వర్చువల్ ఐడీ నంబ‌ర్‌ల‌లో.. కావ‌ల‌సిన దాన్ని ఎంచుకోవాలి. త‌ర్వాత‌ జెనరేట్ ఓటీపీపై క్లిక్ చేయాలి. ఒకవేళ వర్చువల్ ఐడీ లేక‌పోతే, ముందు దానిని జెనరేట్ చేసుకోవాలి.
*  ఆధార్ అనుసంధానిత మొబైల్ నంబ‌ర్‌కు వ‌చ్చిన ఓటీపీని ఎంట‌ర్ చేయాలి.
* ఆధార్ వివరాలను ఉపయోగించడానికి సమ్మతితో పాటు ఓటీపీ సమర్పించిన తరువాత,  మీ పేరు, లింగం, పుట్టిన తేదీ, చిరునామా, ఫోటో మొదలైన వివ‌రాల‌ను ఆధార్ రికార్డుల నుంచి సేక‌రిస్తారు.
* ఎన్‌పీఎస్ రిజిస్ట్రేషన్ ప్రక్రియను పూర్తి చేయడానికి ఇతర తప్పనిసరి వివరాలను చందాదారుడు పూర్తి చేయాలి.
* పాన్ కార్డ్‌, ర‌ద్దు చేసిన చెక్ స్కాన్ చేసిన కాపీని *.jpeg/ *.jpg/ *.png /*.pdf ఫార్మాట్‌లో అప్‌లోడ్ చేయాలి. ఫైల్ సైజ్ 4 కేబి నుంచి 2 ఎమ్‌బి మ‌ధ్య‌న ఉండాలి. 
* మీ సంత‌కాన్ని *.jpeg/ *.jpg/ *.png ఫార్మాట్‌లో అప్‌లోడ్ చేయాలి. ఫైల్ సైజ్ 4కేబి నుంచి 5ఎమ్‌బి మ‌ధ్య‌న ఉండాలి. 
* ఆ త‌ర్వాత‌ ఎన్‌పీఎస్‌కి కాంట్రిబ్యూట్ చేసే మొత్తాన్ని ఆన్‌లైన్ ద్వారా డిపాజిట్ చేసి, డిజిటల్ ప్రామాణీకరణ ద్వారా డిజిటల్ రిజిస్ట్రేషన్ ప్రక్రియను పూర్తి చేయాలి (రిజిస్టర్డ్ మొబైల్ నంబర్, ఈ-మెయిల్ ఐడీకి వ‌చ్చే ఓటీపీ ద్వారా చేయ‌వ‌చ్చు).

పాన్ ద్వారా రిజిస్ట్రేష‌న్ చేసుకునే వారికి కేవైసి మీరు ఎంచుకున్న బ్యాంక్‌/  లేదా నాన్‌-బ్యాంక్ పిఓపి ద్వారా పూర్తిచేస్తారు. రిజిస్ట్రేష‌న్ స‌మ‌యంలో అందించే పేరు, చిరునామా త‌దిత‌ర వివ‌రాలు పీఓపీ రికార్డుల‌లో కేవైసి వెరిఫికేష‌న్ కోసం ఇచ్చిన వివ‌రాల‌తో స‌రిపోలాలి. ఒక‌వేళ స‌రిపోల‌క పోతే మీ అభ్య‌ర్థ‌న తిర‌స్క‌రించ‌బ‌డుతుంది. అటువంటి సంద‌ర్భంలో సంబంధిత‌ పీఓపీని సంప్ర‌దించాలి.