Ola S1 Air: ఓలా నుంచి మరో విద్యుత్‌ స్కూటర్‌.. ధర, ఫీచర్లు, రేంజ్‌ వివరాలివే..

ఇంటర్నెట్‌ డెస్క్‌: విద్యుత్‌ వాహన విభాగానికి చెందిన ఓలా ఎలక్ట్రిక్‌ భారత్‌లో మరో ఎలక్ట్రిక్‌ స్కూటర్‌ను లాంచ్‌ చేసింది. ఎస్‌ సిరీస్‌లో S1, S1 ప్రో పేరిట ఇప్పటికే విద్యుత్‌ స్కూటర్లను విడుదల చేసిన ఆ సంస్థ.. తాజాగా S1 Air పేరిట తక్కువ ధరలో విద్యుత్‌ స్కూటర్‌ను తీసుకొచ్చింది. దీని ధరను రూ.79వేలుగా నిర్ణయించింది. ప్రారంభ ఆఫర్‌ కింద మే 24 వరకు ఈ ధరకు అందుబాటులో ఉంచుతారు. ఆ తర్వాత రూ.85 వేలు చెల్లించాల్సి ఉంటుంది. పెట్రోల్‌తో నడిచే స్కూటర్లను లక్ష్యంగా చేసుకుని తక్కువ ధరలో ఈ స్కూటర్‌ను తెచ్చినట్లు తెలుస్తోంది.

S1 Air స్పెషిఫికేషన్స్‌, రేంజ్‌ విషయానికొస్తే.. ఈ విద్యుత్‌ స్కూటర్‌ ఒకసారి ఛార్జింగ్‌ చేస్తే 101 కిలోమీటర్లు ప్రయాణించొచ్చు. గంటకు 90 కిలోమీటర్ల గరిష్ఠ వేగంతో వెళ్లొచ్చనికంపెనీ తెలిపింది. 4.3 సెకన్లలోనే 0-40 కిలోమీటర్ల వేగాన్ని అందుకుంటుందని పేర్కొంది. సీటు కింద 34 లీటర్ల బూట్‌స్పేస్‌ అందిస్తున్నారు. తక్కువ బరువు ఉండేలా ఈ స్కూటర్‌ను డిజైన్‌ చేశారు. ఇందులో 17.78 సెంటీమీటర్ల టచ్‌స్క్రీన్‌ అందిస్తున్నారు. బ్లూటూత్‌ కనెక్టివిటీ, వైఫై, జీపీఎస్‌ వంటి సదుపాయాలు ఉన్నాయి. ఎకో, నార్మల్‌, స్పోర్ట్స్‌ మోడ్స్‌ ఇస్తున్నారు. మొత్తం ఐదు రంగుల్లో ఈ బైక్‌ లభ్యమవుతుంది. 4.30 గంటల్లో బ్యాటరీని ఫుల్‌ ఛార్జ్‌ చేసుకోవచ్చు. ఓలా ఎలక్ట్రిక్‌ యాప్‌ ద్వారా గానీ, ఓలా ఎలక్ట్రిక్‌ వెబ్‌సైట్‌ ద్వారా గానీ బుక్‌ చేసుకోవచ్చు. ఫిబ్రవరి 1 నుంచి కొనుగోలు కోసం అవకాశం కల్పిస్తారు. ఏప్రిల్‌లో స్కూటర్లను డెలివరీ చేయనున్నారు. ప్రస్తుతానికైతే రూ.999 కట్టి స్కూటర్‌ను రూ.79వేల ధరను రిజర్వ్‌ చేసుకోవచ్చని కంపెనీ ప్రకటించింది.