Hydrogen Bus: ఒలెక్ట్రా హైడ్రోజన్‌ బస్సు.. ఒక్కసారి నింపితే 400km ప్రయాణం

ప్రత్యామ్నాయ రవాణా కోసం ఒలెక్ట్రా గ్రీన్‌టెక్‌ హైడ్రోజన్ బస్సు (Olectra Hydrogen Bus)లను తయారు చేస్తోంది. తాజాగా రిలయన్స్‌ భాగస్వామ్యంలో ఓ బస్సును ఆవిష్కరించింది.

Published : 23 Feb 2023 22:37 IST

దిల్లీ: రిలయన్స్ సాంకేతిక భాగస్వామ్యంలో ఒలెక్ట్రా గ్రీన్‌టెక్‌ హైడ్రోజన్‌ బస్సు (Olectra Hydrogen Bus) తీసుకొస్తోంది. దీన్ని గురువారం ఆవిష్కరించింది. కర్బన రహిత ప్రజా రవాణాను అందించాలన్న ప్రభుత్వ లక్ష్యానికి అనుగుణంగానే దీన్ని తీసుకొస్తున్నట్లు తెలిపింది. సహజ వనరులు తరిగిపోతుండడం, వాయు కాలుష్యం నేపథ్యంలో ప్రత్యామ్నాయంగా హైడ్రోజన్‌ బస్సు (Olectra Hydrogen Bus)లను తయారు చేస్తున్నట్లు ఒలెక్ట్రా గ్రీన్‌టెక్‌ తెలిపింది.

12 మీటర్ల పొడవున్న ఈ బస్సులో 32 నుంచి 49 సీట్ల సామర్థ్యం ఉంది. ఒకసారి హైడ్రోజన్ పూర్తిస్థాయిలో నింపితే 400 కి.మీ వరకు ప్రయాణిస్తుంది. హైడ్రోజన్‌ను నింపడానికి 15 నిమిషాల సమయం పడుతుంది. కేవలం నీటిని మాత్రమే ఉద్గారంగా విడుదల చేస్తుంది. బస్సు పై భాగంలో టైప్‌-4 హైడ్రోజన్‌ సిలిండర్లను అమర్చారు. ఇవి -20 నుంచి +85 డిగ్రీల సెల్సియస్‌ ఉష్ణోగ్రత వరకు తట్టుకుంటాయి. ఏడాది వ్యవధిలో వీటి వాణిజ్య విక్రయాలను ప్రారంభించనున్నట్లు ఒలెక్ట్రా తెలిపింది.

ఒలెక్ట్రా గ్రీన్‌టెక్‌ కంపెనీని 2000 సంవత్సరంలో స్థాపించారు. ఇది దేశీయంగా విద్యుత్‌ బస్సులను తయారుచేస్తోంది. మరోవైపు భారత్‌లో విద్యుత్‌ సరఫరా, పంపిణీ నెట్‌వర్క్‌లకు కావాల్సిన సిలికోన్‌ రబ్బర్‌/ కాంపోజిట్‌ ఇన్సులేటర్లను తయారు చేస్తున్న అతిపెద్ద సంస్థ ఇదే.


Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని