Idli: ఒకే ఒక్కరు.. ఏడాదిలో స్విగ్గీలో రూ.6లక్షల ఇడ్లీలు ఆర్డర్‌

ఇంటర్నెట్‌ డెస్క్‌: ప్రాంతాన్ని బట్టి మన దేశంలో బ్రేక్‌ఫాస్ట్‌ వంటకాలు మారుతుంటాయి. అయితే, ఎన్ని రుచులున్నా దక్షిణాదిలో ‘ఇడ్లీ (Idli)’ చాలా పాపులర్‌ బ్రేక్‌ఫాస్ట్‌. రుచితో పాటు ఆరోగ్యానికి మంచిదని చాలా మంది ఇడ్లీని అమితంగా ఇష్టపడుతారు. అందుకేనేమో ఓ వ్యక్తి ఆన్‌లైన్‌ ఫుడ్‌ డెలివరీ యాప్‌లో ఈ వంటకాన్నే అత్యధికంగా ఆర్డర్‌ చేశారు. ఏడాది కాలంలో ఏకంగా రూ.6లక్షల విలువ చేసే ఇడ్లీలను కొనుగోలు చేశారు. గురువారం (మార్చి 30) ‘ప్రపంచ ఇడ్లీ (Idlis) దినోత్సవాన్ని’ పురస్కరించుకుని ప్రముఖ ఫుడ్‌ డెలివరీ యాప్‌ స్విగ్గీ (Swiggy) ఈ వంటకంపై తన వార్షిక నివేదికను విడుదల చేసింది.

2022 మార్చి 30 నుంచి 2023 మార్చి 25 మధ్య కాలంలో ఇడ్లీ (Idli) ఆర్డర్లపై అధ్యయనం చేసిన స్విగ్గీ ఈ నివేదికను తయారుచేసింది. ఈ 12 నెలల కాలంలో స్విగ్గీ 3.3 కోట్ల ప్లేట్ల ఇడ్లీలను డెలివరీ చేసిందట. అత్యధికంగా బెంగళూరు, హైదరాబాద్‌, చెన్నై నగరాల నుంచి ఈ ఆర్డర్లు వచ్చినట్లు కంపెనీ వెల్లడించింది. ఆ తర్వాత కోల్‌కతా, కోచి, ముంబయి, కొయంబత్తూర్‌, పుణె నుంచి కూడా ఇడ్లీ ఆర్డర్లు అత్యధికంగా ఉన్నట్లు పేర్కొంది.

ఇక, హైదరాబాద్‌కు చెందిన ఓ స్విగ్గీ (Swiggy) కస్టమర్ ఏడాది కాలంలో రూ.6లక్షల విలువ చేసే ఇడ్లీలను తమ వేదికపై ఆర్డర్‌ చేసినట్లు పేర్కొంది. ఆ కస్టమర్‌ మొత్తం 8,428 ప్లేట్ల ఇడ్లీలను (Idlis) స్విగ్గీలో కొనుగోలు చేశారని తెలిపింది. హైదరాబాద్‌ మాత్రమే గాక.. బెంగళూరు, చెన్నై నుంచి కూడా ఆ వ్యక్తి ఆర్డర్‌ చేసినట్లు వెల్లడించింది. ఇక స్విగ్గీలో ఎక్కువ మంది మసాలా దోశను కొనుగోలు చేసినట్లు కంపెనీ తన నివేదికలో పేర్కొంది.