Pebble: ఆండ్రాయిడ్‌ వెర్షన్‌లో స్మార్ట్‌ఫోన్‌ మినీ.. ప్రకటించిన పెబ్లే

ఇంటర్నెట్‌ డెస్క్‌: స్మార్ట్‌ఫోన్‌ (Smartphone)లు మార్కెట్లోకి వచ్చాక.. ప్రతి ఒక్కరి చేతిలో అరచేతి కంటే పెద్ద సైజు స్క్రీన్‌తో ఉండే ఫోన్లు దర్శనమిస్తున్నాయి. దీంతో చిన్న ఫోన్‌ వాడాలనుకునే వారు కూడా వీటినే ఉపయోగించక తప్పనిసరి పరిస్థితి. కొన్నేళ్ల క్రితం యాపిల్‌ (Apple) కంపెనీ చిన్న స్క్రీన్‌తో ఐఫోన్ ఎస్‌ఈ (iPhone SE) మోడల్‌ను తీసుకొచ్చింది. అప్‌గ్రేడేషన్‌లో భాగంగా దానికి కొనసాగింపుగా తీసుకొచ్చిన ఐఫోన్‌ ఎస్‌ఈ 2, ఎస్‌ఈ 3 మోడ్సల్ స్క్రీన్‌ సైజ్‌లను కూడా పెంచేసింది. తర్వాత ఐఫోన్‌ 13 మోడల్‌లో మినీ వేరియంట్‌ను పరిచయం చేసినప్పటికీ, అమ్మకాల పరంగా నిరుత్సాహపరచడంతో యాపిల్‌ వాటి తయారీని నిలిపివేసింది. తాజాగా పెబ్లే (Pebble) అనే స్మార్ట్‌వాచ్‌ తయారీ కంపెనీ ఆండ్రాయిడ్‌ వెర్షన్‌ మినీ ఫోన్‌ను తీసుకురానున్నట్లు ప్రకటించింది. 

ఇందుకోసం పెబ్లే కంపెనీ వ్యవస్థాపకుడు ఎరిక్‌ మిగికోవ్‌స్కీ (Eric Migicovsky) ఆండ్రాయిడ్ ఫోన్ ప్రాజెక్ట్‌ (Android Phone Project)ను గతేడాది మేలో  ప్రారంభించారు. ఈ ప్రాజెక్ట్‌ ద్వారా పెద్ద కంపెనీలతో కలిసి సాధారణ ఆండ్రాయిడ్ ఫోన్‌ తరహా ఫీచర్స్‌తో ఆండ్రాయిడ్ మినీ (Android Mini) స్మార్ట్‌ఫోన్‌ను మార్కెట్లోకి విడుదల చేయాలనుకున్నారు. కానీ, పెద్ద స్మార్ట్‌ఫోన్‌ తయారీ కంపెనీలు దీనిపై ఆసక్తి కనబరచకపోవడంతో,  పెబ్లే స్వయంగా ఆండ్రాయిడ్ మినీ ఫోన్‌ను మార్కెట్లోకి తీసుకురావాలని నిర్ణయించింది.  ఆండ్రాయిడ్ ఓఎస్‌తో పనిచేసే ఈ ఫోన్‌ చేతిలో ఇమిడిపోయే డిజైన్‌,  అత్యుత్తమ క్వాలిటీ కెమెరా లెన్స్‌, అధిక సామర్థ్యం కలిగిన బ్యాటరీ వంటి ఫీచర్లు ఉంటాయని ఎరిక్‌ తెలిపారు. అలానే పెబ్లే ఆండ్రాయిడ్ మినీ ఫోన్‌తో గూగుల్, శాంసంగ్‌ వంటి కంపెనీలు సైతం మినీ మోడల్స్‌ను తయారు చేస్తాయనే ఆశాభావం వ్యక్తం చేశారు.