తొమ్మిదో రోజు పెరిగిన ఇంధన ధరలు

దిల్లీ: దేశంలో ఇంధన ధరలు మరోసారి పెరిగాయి. అంతర్జాతీయ మార్కెట్లో చమురు ధరల పెరుగుల కారణంగా బుధవారం మరోసారి భారత్‌లో పెట్రోల్‌, డీజిల్‌ ధరలు పుంజుకున్నాయి. కాగా దేశంలో ఇంధన ధరలు పెరగడం వరుసగా ఇది తొమ్మిదో రోజు కావడం గమనార్హం. దేశరాజధాని దిల్లీలో లీటర్‌ పెట్రోల్‌పై 25 పైసలు పెరిగి రూ.89.54గా నమోదైంది. లీటర్‌ డీజిల్‌పై 25పైసలు పెరిగి రూ.79.95 వద్ద నిలిచింది. 

ఇక దేశ ఆర్థిక రాజధాని ముంబయిలో పెట్రోల్‌ ధరలు రికార్డు స్థాయిలో లీటర్‌ రూ.96 ఉండగా.. డీజిల్‌ ధర రూ.86.98 గా ఉంది. ఇక హైదరాబాద్‌లోనూ పెట్రోల్‌ ధర గరిష్ఠ స్థాయిలో నమోదైంది. లీటర్‌ పెట్రోల్‌ ధర రూ.93.10 ఉండగా.. డీజిల్‌ ధర రూ.87.20 గా నమోదైంది. కాగా ఇంధన ధరలు ఇలా అమాంతం పెరుగుతూ పోతుంటే సామాన్యుడిపై తీవ్ర ప్రభావం పడుతోందని ప్రతిపక్షాలు కేంద్రంపై విమర్శలు కురిపిస్తున్నాయి. వెంటనే ఇంధన ధరలు తగ్గించి ప్రజలకు ఉపశమనం కల్పించాలని కాంగ్రెస్‌ డిమాండ్‌ చేస్తోంది.