Petrol Prices: పెట్రో మంట.. 10 రోజుల్లో రూ.6.40 పెంపు..

హైదరాబాద్‌లో రూ.115 దాటిన పెట్రోల్‌ ధర

దిల్లీ: సామాన్యుడి గుండె జారిపోయేలా దేశంలో ఇంధన ధరల మోత మోగుతోంది. గురువారం కూడా పెట్రోల్‌, డీజిల్‌ ధరలను 80 పైసల చొప్పున పెంచుతూ చమురు సంస్థలు నిర్ణయించారు. గత 10 రోజుల్లో 9 సార్లు వీటి ధరలను సవరించగా.. లీటర్‌ పెట్రోల్‌ ధర రూ.6.40 పెరగడం గమనార్హం. దీంతో దేశ రాజధానిలో లీటర్‌ పెట్రోల్‌ ధర రూ.101.81కి చేరింది. ముంబయి, కోల్‌కతాల్లో, హైదరాబాద్‌ల్లో అయితే ఏకంగా రూ.110 దాటేసింది. 

137 రోజుల విరామం తర్వాత మార్చి 22న పెట్రోల్, డీజిల్‌ ధరలను 80 పైసల చొప్పున పెంచిన విషయం తెలిసిందే. నాటి నుంచి ఒక రోజు మినహా దాదాపు ప్రతి రోజూ ధరల పెంపు కొనసాగుతోంది. అటు గ్యాస్‌ ధరలు కూడా పెరగడం, నిత్యావసరాలు మండిపోతుండటంతో సామాన్యులు తీవ్ర ఇబ్బందులు ఎదుర్కొంటున్నారు. చమురు ధరల పెంపునకు నిరసనగా కాంగ్రెస్‌ పార్టీ నేటి నుంచి దేశవ్యాప్తంగా ఆందోళనలు చేపట్టింది. దిల్లీలో ఆ పార్టీ అగ్రనేత రాహుల్‌గాంధీ నిరసనల్లో పాల్గొన్నారు.

ప్రధాన నగరాల్లో చమురు ధరలు ఇలా ఉన్నాయి..

దిల్లీ: పెట్రోల్‌ రూ.101.81, డీజిల్‌ రూ.93.07

ముంబయి: పెట్రోల్ రూ.116.72, డీజిల్‌ రూ.100.94

చెన్నై: పెట్రోల్‌ రూ.107.45, డీజిల్‌ రూ.97.52

కోల్‌కతా: పెట్రోల్‌ రూ.111.35, డీజిల్ రూ.96.22

హైదరాబాద్‌: పెట్రోల్‌ రూ.115.42, డీజిల్ రూ.101.58